Хәрбиләргә челтәрне җырлый-җырлый үрәләр

Россия Президенты Владимир Путин тәкъдимендәге 2025 ел – Ватан сакчылары елы Балык Бистәсе районының Балтач авылы мәдәният йортындагы чараларның шигаре булып тора.

– Махсус хәрби операция башлангач авыл халкы әледән –әле гуманитар ярдәм җыеп Донбасска озата. Хәрбиләр өчен яшеренү челтәрләре дә үрәбез. Бу шөгыльдән авылыбызның бер генә хатын-кызы да читтә калмый, район үзәгендә яшәүчеләр дә кайта. Өйдәге эшләрне һәм терлекләрне карыйбыз да, клубка челтәр үрергә йөгерәбез, җырлый-җырлый эшлибез. Мәдәният йортындагы быелгы чаралар “Ватан сакчылары елы” шигарендә бара. Челтәр үргәндә үзебезне Ватан сакчылары сыйфатында хис итәбез. Хәрбиләребез исәнлегенә Коръән сурәләре, догалар да укып алабыз, – ди Балтач авылы мәдәният йорты директоры Алсу Вафина.

 Балтач авылы хатын-кызларының хәрбиләргә челтәр үрүләре чигү эше белән дә ялганып алды әле.  Алсу Нотфуллина  һөнәре буенча бухгалтер булса да, чигү белән нык мавыга.

– Туган тиешле Сәрия апам яшәүче Балтач авылында “Чигү дәресе” үткәрергә шактый хыялланып йөрдем. Җепләр белән тукымалар хәстәрләдем. Дәресемә шулкадәр күп кеше килер, дип, ышанмаган да идем. Балаларның җыелышуы аеруча сөендерде. Татар халкы туку-чигү эшләрендә оста булган. Милли традицияләрне һәм һөнәрләрне балаларга да өйрәтергә кирәк, – ди Алсу Нотфуллина.