Зилә Вәлиева: «Батырлар. Татарстан Геройлары» - актуаль һәм әһәмиятле программа

«Әлеге программа махсус операциядә катнашып сынау узган, кешеләрне катлаулы бурычлар чишәргә мобилизацияләп, алар белән нәтиҗәле эшләргә әзерлек күрсәткән кешеләргә йөз тота. Эшкә күпкә әзеррәк, реаль тәҗрибәсе һәм оештыру сәләте булган кадрларны җәлеп итү белән дәүләт дә, җәмгыять тә кызыксына. Аларның тәҗрибәсе эшләргә тиеш», – дип сөйләде «Татар-информ»га Татарстан Иҗтимагый палатасы рәисе Зилә Вәлиева. Шулай ук ул, махсус операция өч ел дәвам иткән чорда Татарстан халкы үз якташларының бик күп батырлыкларына шаһит булды, диде. Аның сүзләренчә, программа катлаулы шартларда иң төгәл һәм нәтиҗәле карарлар кабул итә белгән махсус операциядә катнашучыларны сайларга мөмкинлек бирәчәк.

«Без аларның хәрби бүлекчәләрне дә, зур булмаган хәрби бүлекчәләрне дә оештыра белүләрен, шул ук вакытта кирәк вакытта тыныч халыкка ярдәмгә килүләрен дә күрдек. Бу авыр тәҗрибә кешеләрне үз артыннан ияртергә сәләтле бик күп инициативалы, тәвәккәл лидерларны күрсәтте. Бүген без бу потенциалны муниципаль һәм республика дәрәҗәсендә, төрле оешмаларда һәм юнәлешләрдә җитәкче кадрлар сайлаганда кулланырга тиеш», – дип өстәде ул.

Зилә Вәлиева мобилизацияләнгәннәрнең һәм үзе теләп китүчеләрнең, һөнәрләрен тыныч тормышта калдырып эш урыннарыннан китүләренә һәм яңа тәҗрибә туплауларына игътибар юнәлтте. «Махсус операциядә катнашучылар өчен бу программадан нинди файда? Бу үзеңне күрсәтү, белемнәреңне тулыландыру, яңа тәҗрибә туплау мөмкинлеге. Бәлки махсус операциядән кайткач, квалификацияле белгечләр үз өлкәсенә кайтыр яки үз эшен ачар. Ә аларның кайберләренә бу программа иҗтимагый лидер буларак тавышка куелу мөмкинлеге бирәчәк», – диде Зилә Вәлиева.

Аның фикеренчә, махсус операциядә катнашучыларны идарәче кадрлар мохитенә җәлеп итү – аерым оешмалар, ведомстволар өчен генә түгел, республика һәм җәмгыять өчен тулаем файдалы.

«Республика Рәисе Рөстәм Нургали улы Миңнехановның республика программасы кабул итү инициативасын бик вакытлы һәм әһәмиятле дип саныйм. Рөстәм Нургалиевич үзе төрле участокларда эшләгән һәм уңышлы җитәкче өчен тәҗрибә, практика һәм, әлбәттә, кешеләргә карата хөрмәт бик мөһим икәнен һәрвакыт әйтеп килә. Егетләребез, каһарманнарыбыз, махсус операциядә катнашучылар – бу сыйфатларны иң катлаулы шартларда: сугыш барганда, тыныч халыкны коткарганда күрсәтә алды», – дип йомгаклады ул.

Чыганак: Татар-информ