11-13 килограммлы карбызлар үстергән

11-13 килограммлы карбызлар үстергән. Аның белән элемтәгә кереп шул хакта кыскача гына әңгәмә корып алдык. 
– Карбызны икенче ел рәттән утыртам, – дип башлады сүзен әңгәмәдәшем. – Үзе баллы, үзе сусыл, авызда эреп китә. Шаккатып ашадык. Быел җәй яңгырга бай булганга, бакча тулы яшелчә, җиләк-җимеш үстердек. Бернинди ашламалар да кертмәгән килеш майның егермеләрендә, көннәр җылыткач, җиргә карбыз орлыгы төрттем. Көнгә икешәр тапкыр, иртә-кич су сиптем. Шулай яратып тәрбияләгәнгә күрә уңыш та мулдан булгандыр. 
Җыеп алган карбыздан Сиринә апа туганнарын, күршеләрен авыз иттерергә уйлый. Элегрәк аның апасы да карбыз үстереп караган булган, тик андый күләмле уңыш ала алмаган. 

Авыл кешесе тиктормас бит инде ул. Яздан алып кара көзгә чаклы бакчадан керми. Сиринә апа әле дә бакчасында казына, куакларны кышка әзерләү белән мәшгуль. Җәен кызыл һәм азык чөгендере, бәрәңге, кишер, кабак, көнбагыш, бакча һәм кура җиләгеннән мул уңыш алган. Гомумән, Буа җирләре уңдырышлы, кара туфракка бай, шуңа уңышның мул булуы да гаҗәп түгел.

Алинә Фәхретдинова,
Буа районы