Апастан Ләйсәнә Гатауллина мул уңыш алу серләре белән уртаклаша

- Бакчачылык белән яшьтән үк кызыксынам. Интернеттан укыйм, яңа сортлар өйрәнәм. Үзебезгә туры килгәннәрен икенче елга күбрәк утыртам. Мин бу эшне яратып, чын күңелдән эшлим. Ә яшелчәләр игътибарны, тәрбияләгәнне тиз сизә, - ди Ләйсәнә апа. 

Ләйсәнә апа Гатауллина озак еллар район башкарма комитетының территориаль үсеш бүлегендә хезмәт итте. Җаваплы, тынгысыз, зур төгәллек таләп иткән хезмәтеннән соң да бакчада казынып яңа көнгә көч җыйган чакларын бүген инде искә алып кына сөйли. Лаеклы ялга чыккач, яраткан шөгыленә вакыт тагын да күбрәк кала. Күп, өзлексез хезмәт таләп итсә дә, бакча, теплица аның өчен эш урыны түгел, ә ял мәйданчыгын хәтерләтә. 

- Үсентеләрне тәрәзә төбендә үстереп чыгарам. Февраль ахыры, март башында ук чәчәм. Сыналган сортларны гына утыртырга тырышам. Сортны сынар өчен башта бер-икене генә үстереп карыйм. Һәр сортның кырыена язып куям. Орлыкларны үзем ясарга тырышам, - ди Ләйсәнә апа. 

Помидорлар куакның төбеннән үк уңышка күмелгән. Эре-эре кып-кызыл хезмәт җимешләрен эшкәртеп кенә бетер. Кыярлар да сап-сары чәчәктә. Бүген утырткан яшь куак кебек уңыш бирә. Юкса, алар инде апрель аеннан бирле үз кыярлары белән сыйлана. Бакчада нинди генә җиләк-җимеш үсми. Ишегалды чәчәккә күмелгән. 

Уңышның сере дә гади генә икән. Бары тик иренмәскә һәм Ләйсәнә апаның уңган, җитез куллары кирәк. 
- Өч атна саен терлек тиресен әчетеп сибәм. Әлеге әчеткегә көл дә кушам. Атнага бер ян яфракларын өзәм. Помидорлар ике тармакта гына үсә. Ә төбенә салам түшим. Атнага бер су сибәбез. Шартын китереп тәрбияләгәч, 34 төп помидордан да мул итеп уңыш алып була. Яфракларны артык та кисәргә ярамый. Аларны помидорның бармаклары дип карарга кирәк. Һәр яфракның үз функциясе. Ул помидорларны үстерә. Помидорлары кызарып беткәч кенә, әлеге  өлештәге яфракларны кисәм. Әнә шулай куактагы помидорлар өскә таба кызара бара, - ди ул. 

Теплицадагы кыярның куерып китүен дә яратмый Ләйсәнә апа. Ул аларны бер генә тармакта үстерә. 
- Куе булса, авырулар үрчи. Кыярны җыям һәм яфракларын кисеп, ботагын аска төшерә барам. Бу очракта авыру үрчеп өлгерми. Суны кызу чакта иртә-кич, хәзер исә иртән генә сибәбез. Теплицаны ачык тотарга тырышам. Шулай ук көл һәм тирес әчеткесе сибәм, - дип серләре белән дә уртаклашты Ләйсәнә апа. 
Гатауллиннар йортында берсеннән-берсе матур чәчәк-гөлләр дә үсә. Алар һәрберсе хуҗабикәнең яратуын, игътибарын һәм тырыш кулларының җылысын тоя. Шуңа да шаулап чәчәк аталар, күңелләрне иркәләрлек матурлык өләшәләр. 

Ләйлә Шиһабиева