Бакчачы Гәрәй абый

- Минем әнием күрше Смәел авылыннан. Смәеллеләр алар - бакчачылар. Гомер-гомергә иң беренчеләрдән булып кыяр өлгертеп сатканнар. Смәел карлыганнары дигән төшенчә дә бар. Әниемнең сеңлесе, күрше Кукмара районына хәтле барып суган, карлыган сатып, ул заман өчен бик зур акчалар эшләгән. Бакчачы булам дип кенә бакчачы булып булмый, ул минем кандадыр инде, бик яратам бакча эшен, - ди Гәрәй абый.

Узган елларда бәрәңге үстереп тә сатканнар. Мәшәкате бик күп дип, аны ташлап, хәзер бакча җиләгенә күчкәннәр. Бәрәңге басуының да бер өлешендә - җиләк.

- Төрлечә итеп утыртып карадык та җиләкләрне аз гына түбәнрәк утыртуны отышлы дип таптык. Яңгыр, сипкән су да түбәнлектә, әлбәттә, әйбәтрәк сеңә. Түтәл араларына салам җәябез: йөрергә дә уңайлы, черемә дә була, чүп чыгармый, дымны да саклый. Ризык булса, нишләтсәң дә була. Сатабыз яки печәнгә, саламга, ашлыкка алмаштырабыз. Мөгезле эре терлекләрне дә күпләп асрыйбыз, - ди әңгәмәдәшем.

Гәрәй абый карлыганнар да үстерә, чия, слива агачларының да мәшәкате аз ди. Бакчада аларны санап бетерерлек түгел. Барысының да җимешләрен сата, азмы-күпме керем ала. Монысы да үзенә күрә бер талант. Элегрәк заманда татар авылларында бакча үстерү бик сирәк күренеш булган, ә инде аның уңышын сатып акча эшләү турында әйтеп тә торасы юк. Смәел авылы халкына әлеге күркәм сыйфат каяндыр килгән. Гәрәй абый шуның тере бер үрнәге. Үзеңә һөнәр, шөгыль сайлаганда әби-бабайларың турында белсәң, кызыксынсаң, дөрес юлны сайлау җиңелрәк шул.