Балтач авылы ир-атлары мәш килеп күпер төзекләндерә

Гражданнарның үзара салым буенча җыешкан акчаларына өстәмә финанслау өчен 2026 елда республика бюджетында 1,4 миллиард сум каралган.

Татарстан Дәүләт Советының мактаулы Рәисе Фәрит Мөхәммәтшин әйткәнчә, үзара салымны дәүләт тарафыннан өстәмә финанслау алымы 2013 елдан башлап кулланыла.

– Үзара салым акчасы авыл эчендәге юлларны, күперләрне төзекләндерүгә, су кертүгә, урамнарда яктырткычлар куюга, спорт һәм балалар уен мәйданчыклары төзүгә, чишмәләрне һәм һәйкәлләрне карауга тотыла, – ди Фәрит Мөхәммәтшин.

Балык Бистәсе районындагы Балтач (Юлсубино) авылында да үзара салым акчасына урамнар юлларына вак таш түшәлде, баганаларга энергиягә сакчыл яктырткычлар куелды.

– Быелгы үзара салым акчасын авыл эчендәге күперне киңәйтүгә һәм төзекләндерүгә тотарга уйлаштык. Эшне авылыбыз ир-атлары башкара. Балык Бистәсе бетон заводыннан бетон кайтартабыз. Халыкка рәхмәт! Үзара салым буенча акча җыешуда һәр гаилә катнаша, – ди Балтач авылы җирле үзидарәсе рәисе Нияз Гарипов