Биектау районында яшәүче Сәгадәтбану Җиһаншинага 100 яшь тулган

- Бер йортта дүрт буын яшәп ятабыз, - ди Фидания апа.
Сәгадәтбану әби балалар укыткан, вафат булган ире дә мәктәптә эшләгән. Киленнәре дә шул ук һөнәр иясе.
- Әни күп сөйләшергә яратмый. Үзе ипле, тыныч кеше. Балаларны тәрбияләү, әхлак темасына сөйләшергә ярата. Төпле киңәшләрен бирә. Гомер буе газета укырга яратты. Аның өчен татарча газеталар яздырдык. Соңгы елда гына күзләре начар күрүдән зарлана. Моңа кадәр вак-төяк тегү эшләрен дә үзе башкарды. Телевизорны да сирәк карый башлады, татарча сериалларын калдырмыйча карап бара иде. Җәйне авылда уздырабыз. Быел үрдәкләр сатып алдык, капка төбендә җылы кояш нурлары астында шуларны карап утырды, - ди килене.

Сәгадәтбану апа ире белән өч бала тәрбияләп үстергән. Олы улы иртә дөнья куйган. Кызлары Чаллыда, төпчек улы Казанда яши.
- Әни белән кырык ике ел бергә торабыз, үзара дус-тату яшәдек. Балаларны да карарга булышты, оныклары җәйне гел аның янында уздыралар иде, - ди Фидания апа.

^biektaw.ru