“Бу авылны торгызу, аңа яңа сулыш бирү чоры”: Елховой авылында Кизләү чишмәсен ачтылар

Яңартылган су чыганагы белән бергә җирле халыкка һәм кунакларга яңа скверны да тәкъдим иттеләр. Кайнар чәй, пылау, тәм-томнар һәм авыл халкының җыр-биюгә бай концерты исә бу яңгырлы көнне аеруча бизәп җибәрде.

Искәртеп узарга кирәк, әлеге чишмә үзенең шифалы суы һәм риваять-йолаларда сакланган бай тарихы белән дан тота. Җирле халык аны хәтта “авыл йөрәге” дип атый. Элек биредә туйдан соң кәләшне каршы алу һәм башка бәйрәм-йолаларны үткәргәннәр. Чишмә үзе исә изге саналган һәм төрле авырулардан ярдәм иткән.

“Авыл җирлеге башлыгы булсам, бу чишмәне төзекләндерү өчен бөтен көчемне куярмын дип хыялландым һәрвакыт. Бу бит су чыганагы гына түгел – ул безнең тарихыбыз һәм күңелебез. Кизләү чишмәсе безнең авыл өчен генә түгел, аңа якын авыл, хәтта районнар өчен дә шифалы су чыганагы. Төзекләндерү эшләре вакытында да без аңа керү юлын япмадык, кешеләр килә торды, судан файдалана тордылар. Соңгы елларда чишмә бик нык тузды, кое нигезеннән алып аның янындагы бөтен нәрсә торгызылуга мохтаҗ иде. Чишмәне грант акчасына төзекләндерә алдык, нефтьчеләребезгә рәхмәт”,– дип билгеләп үтте Елховой авыл җирлеге башлыгы Алмаз Хәсәншин.

“Бу авылны торгызу, аңа яңа сулыш бирү чоры. Елховай кебек урыннарның күбрәк булуын бик телим. Бу очракта яшьләрнең калырга сәбәбе, авылның киләчәге булыр иде. Әлеге чишмә – авыл өчен урын булган дөньяның искиткеч бер үрнәге,– дип ассызыклый Кизләү чишмәсен проектлауда катнашкан “НОВЬ” Социомәдәни проектлау бюросы кураторы Полина Еж.