«Эш башлаучыга Аллаһы Тәгалә бәрәкәтен дә җибәрә»

Яңа эш башлаучыга Аллаһы Тәгалә барыбер бәрәкәтен җибәрә. Буа районының Зур Кырлангы авылы фермеры Илнур Гайнетдинов шулай ди.

Илнур фермер хуҗалыгы булдырганчы ук өендә күп итеп терлек асраган. Биш сыеры, бозаулары, атлары, сарыклары өстенә, күп итеп казлар да асраган. Берара куяннары да булган.

– Фермерлык эше яңа дип әйтеп булмый, авыл кешесе өчен гадәти инде ул. Эш кенә арта, – ди фермер.

Сыерлар санын биштән 24кә җиткергән. Таналар, бозау­лар саны да арткан. Ике үгез дә асрый. Терлекләр саны барысы 45кә җитә. Грант акчасына төзелгән зур яңа фермада әле сарыклар да урын алган. Корбанлык итеп сатар өчен тота икән.

Сарык йонын алырга кеше кирәк, шуңа да Допер дигән токымлы сарыклар асрап карарга булган. Аларның йоннары үзләре коела, ди. Сарык асрауның тагын бер сере: сыерлардан калган азыкны алар рәхәтләнеп ашап бетерә. Сыер да, сарыклар да тук, азык та әрәм булмый.

Якын араларда Илнур сыерлар санын 30га җиткерергә уйлап тора. Ярдәмгә ике кеше өстенә тагын берәү кирәк булачак, ди. Эшчеләр дигәннән, аларны табу бер проблема икән. Аңарда эшли торган егетләрнең берсе – күрше районнан, икенчесе – күрше республикадан.

Җәйләрен көтүче дә яллый. Бер айга бер сыер өчен мең сум түләгән. Узган ел көтү җирләрен рәсмиләштереп калдырган. Анысы белән проблема булмаячак, ди әңгәмәдәшем.

Арендага алган 30 гектар җирендә күпьеллык үлән чәчә, ике тракторы, чәчкече бар. Илнур әйтүенчә, дәүләттән ярдәм төрләре күп, алар белән вакытында танышып барырга һәм тәвәккәлләргә генә кирәк. Бүген аңа бу зур эшне алып барыр­га әтисе, хатыны Марина һәм улы да булыша.

– Эштә кыенлыклар чыкмый тормый, төрле хәл була, әмма гаилә белән сөйләшеп киңәшләшкәч, тынычланасың, алар сине хуплап торса, ышаныч тагын да арта, – ди фермер.