«Иң акыллы атны Чечнядан алып кайттык»

Шундый тупланма җир дип әйтергә дә була инде. Хуҗалыкта 5 жокей һәм ике көтүче хезмәт куя. Алар иртәнге сәгать дүрттән эшли башлыйлар. Баксаң, саф һаваның да файдасы бар, җылынган чабыш атның аяклары өчен чык булу да зур мәгънәгә ия икән. 

Шул фермада жокей булып эшләүче Ранис Таҗетдинов белән сөйләшеп киттек. Ул Әтнәдә авыл хуҗалыгы техникумында укыган, аны ике ел элек монда тренер итеп чакырганнар. Шуннан бирле бөтен җанын-тәнен биреп эшли. 

– Чабыш атларын үрчетү, аларга кирәкле шартлар тудыру аның төп нигезе булып тора. Район башлыгы Рамил Нотфуллин үзе дә атларны бик ярата, еш кына йөреп тә килә. Идеясын авыл хуҗалыгында күп еллар эшләүче кешеләргә җиткергәннән соң, аны хуплап чыгалар һәм шушы ферма сафка басты. Хәзер төрле кешеләр монда үзләренең атларын тота, әйтик, фермерлар, колхоз хезмәткәрләре, хәтта, район башлыгы белән полиция җитәкчесе дә әлеге хезмәттән файдалана. Чабыш атларын без чыныктырабыз, ярышларга әзерлибез. Балтач Сабануенда гына безнең фермадан 22се катнашты, һәрберсе дә яхшы нәтиҗәләргә иреште, – дип, аңлатты безгә Ранис. 

Ә инде токымнарга килсәк, фермада күбрәк чиста канлы инглиз атлары икән. Алар матур да, әле чыдам һәм чабыш өчен иң шәбе дә санала, ди. Араларында гарәпнекеләр дә күренә. Азык белән аларны “Сосна” колхозы тәэмин итә, чөнки ферманы нәкъ менә шушы оешма төзегән.