“Мондый хәлне күптән күргән юк иде...”

Мәрхүмә Әминә әбиемнең: “Ватан сугышы елларында кар абзарларны күмеп китеп яуды, 45 градус салкыннарда сыерларның борыннарыннан каннар акты”, - дип сөйләгәне хәтердә калган.

Быелгы кыш алай салкыннары белән җәфаламаса да, кар муллыгы белән “рәхәтләндерә”. “Мондый хәлне күптән күргән юк иде”, - дип, баш чайкыйлар әтием Равил Бәдриев белән күршебез Рифкать Надыршин.

Балтач (Юлсубино) авылындагы өйгә, гомумән дә, керә алмадык. Ике атна кайтмаган идек, шул вакыт эчендә кар капканы шыпылдатып “бикләп” куйган. Караклар кебек койма аша төшеп, абзардан көрәк алып казырга туры килде.

Күки белән Балтач авылларында урам юллары яхшылап чистартылган, шөкер.
- Авыл халкы җыешкан үзара салым акчасына “Беларусь” тракторы алдык, дәүләт тә акча өстәгәч, әйбәт кенә булды ул. Шул трактор белән урамнар юлларын чистартып торабыз, юл өзеклегенә ирек бирмибез, - ди Күки җирле үзидарәсе рәисе Альберт Бәдретдинов.

Балтачта килешү нигезендә Рөстәм Мостафин урамнарны һич кичекмичә кардан арындырып тора. Элекке шикелле урамда машинада батып ятулар бетте, ә өйгә керәсең килсә, капка төбен генә көрисең инде.