“Сөт бәяләре төшү аркасында планлаштырылган инвестицияләр кимү куркыныч бар”

“2030 елга бер сыерга 10 мең килограммга җиткерү бурычы тора. Селекция-нәсел эшенең заманча сәнәгать ысулларын керткәндә, продуктивлыкны тагын да арттырып була. Федераль проект кысаларында республикада Россиядә иң эре агробиотехнопарк төзелә, ул селекцион тикшеренүләр үткәрүне тәэмин итәчәк һәм савым сыерларының генетик потенциалын яхшыртырга мөмкинлек бирәчәк”, - дип белдерде авыл хуҗалыгы министры Марат Җәббаров ведомствоның коллегия утырышында.  

Министр әйтүенчә, сөт күләме технологияләрне яхшырту һәм заманча сөт комплексларын төзү исәбенә арткан. Узган ел гына да 11 мең башка исәпләнгән 18 объект кулланылышка кертелгән. Быел тагын шундый 19 объект барлыкка килү процессында.

Әмма, сөтне сатып алу бәяләре төшү аркасында, планлаштырылган инвестицияләр кимү куркыныч бар. Шул ук вакытта агымдагы елда кереме 800 млн сумнан артык булган җитештерүчеләр сатылган сөткә федераль субсидия ала алмаячак. Югыйсә күп кенә планлаштырылган проектлар алар артында тора, - диде ул.
Коллегия эшендә катнашкан Россия авыл хуҗалыгы министры урынбасары Роман Некрасовка мөрәҗәгать итеп: "Татарстан - илдә иң күп сөт җитештерүче төбәк. Һәм сөт базарында теләсә нинди бәя тибрәнешләре барыннан да бигрәк бездә чагыла. Сездән 2026 елга әлеге дәүләт ярдәме чарасын яңарту мөмкинлеген каравыгызны сорыйбыз",  диде.