«Сөтне әчетмичә, продукциянең сыйфатын сакларга кирәк»

Ә кайчандыр алар, бәхет эзләп, шәһәргә чыгып киткән булганнар. Ике дистә ел Димитровградта яшәгәннән соң, туган авылларына кайтып төпләнәләр. 

Рәисә апа – балалар бакчасында, Фоат абый хәзерләү конторасында эшләгән, машина да йөрткән. Уллары Фәнил белән Фәннурның институтта укып йөргән вакытлары була.

– Кырык яшьтән соң ияләнгән эшне, хезмәт куеп алган фатирны калдырып китү, күнегелгән тормышны үзгәртү авыр булгандыр? – дип кызыксынабыз алардан. 
– Минем авылдан бөтенләй дә китәсем килмәгән иде, әмма язмышыбыз шәһәр тормышын да татып карасыннар дигәндер. Ничек кенә рәхәт, уңайлы булмасын, туган җир үзенә тартты, – ди Фоат абый.  

Авылда төпләнү турындагы карарны кабул итүгә үк, капылт кына кайтып утырмыйлар. Шәһәрдән торып авылда йорт салып куялар. 
Ун елдан артык авыл халкыннан сөт җыеп сату белән шөгыләнгәннән соң, 2015 елда, тәвәккәлләп, сөт эшкәртү цехын ачып җибәрәләр. Каймак, эремчек, йогырт, катык ясыйлар. 

– Сөтне өч авылдан җыябыз. Көненә бер тоннага кадәр сөт эшкәртү мөмкинлегебез бар. Әмма заявканың күпме булуына карап эшкәртәбез. Калган сөтне сатабыз. Җәй көне эшләү бермә-бер җаваплы. Сөтне әчетмичә, продукциянең сыйфатын сакларга кирәк, – ди Рәисә апа. 
Әзер продукцияне район халкы ала, Казанга, Димитровградка, Ульяновскига озаталар. Ярминкәләргә чыгалар. Бу эш уллары Фәнил өстендә. Ул Буада яшәп, авылга кайтып эшли. Ә Фәннур төзелеш тармагын сайлаган. 

– Бу эшне гаиләбез белән бергә алып барабыз. Улларыбыз да кайтты авылга. Бергә тапкан мал гына кадерле була ул, – ди Фоат абый.  

Билгеле булганча, «Яшәү өчен инфраструктура» илкүләм проекты гамәлгә ашырыла.