Тау бәйрәмендә әби-бабайлар да тау шуа

Яңа елның беренче көнендә шушы авылда туып-үскән һәркем тау буена җыелып, бала чакларын искә төшерә, авылдашлары белән очраша. Беренче тапкыр әлеге бәйрәмне 2023нче елда уздыралар. Авыл халкына бик ошагач, ел саен уздырырга карар кылалар.

Бәйрәмнең төп оештыручы Фәргать Нәҗипов әйтүенчә, бәйрәм бар авыл халкының тырышлыгы белән уза. Ир-егетләр чыгымнарны каплар өчен финанс яктан булышса, хатын-кызлар килгән авылдашларын сыйларга дип коймак пешерә, самоварда чәй кайната, төрле уеннар оештыралар. Алдагы елларда казан тутырып пылау белән дә сыйлаганнар. Быел исә авылдашлары пылау белән мәшакатьләнмәскә кушканнар.

Тау бәйрәменә нигез авылда электр баганаларын алмаштырганнан соң салына. “Сәрдегәнгә баганалар алмаштырганда әти тау башына багана куйдырсаң, яхшы булыр иде, авыл балаларына тау шуар өчен менә дигән урын булачак, диде. Аның фикерен куәтләп, баганалар сатып алдым, электр чыбыклары суздырдык. 2022 елның 31 декабрендә кинәт кенә башка Сәрдегәндә Тау бәйрәме уздырырга кирәк дигән фикер килде. Авылның тырыш егетләре белән элемтәгә чыктым, алар шунда ук күтәреп алдылар. Бер көн эчендә оештырдык, икенче көнне бөтен авыл кешесе актив булып тау итәгенә җыелды. Менә шуннан башланып китте. Авылдашларга бик ошады. Бу бәйрәмне киләчәктә дә бергәләп уздырырга булдык”, - ди Фәргать Нәҗипов.

Хәзер бу урын тау шуу урыны гына түгел, авылның чаңгы трассасына әверелгән. Фәргать тау итәгенә, үзләренең бакча башларына кечкенә генә йорт төзеп куйган. Гаиләләре белән килеп, ял итәргә теләүчеләр өчен менә дигән урын. “Су буена йорт салу минем кечкенәдән хыялым иде, - ди Фәргать. – Буш вакытларда ял итә, күңелгә тынычлык бирә торган җир эшлисем килде”.

Бәйрәм авыл халкының очрашуы һәм артистларның чыгышы белән үрелеп бара. Аны ел саен Балтач районы егетләре Айдар һәм Ренат Галиәскәровлар алып бара. Быелгы чарада Рәфис Кәримуллин, Рамил Гозәеров, Рәшит Сабировлар катнашуы да көтелә. Җырлы-биюле,уенлы, лотереяле әлеге бәйрәм 1 гыйнварьда 17.00 сәгатьтә башланачак.

- Без әлеге бәйрәмне бик көтеп алабыз, - ди Бөрбаш авылында яшәүче Гөлнур Мифтахова. – Анда авылдан чыгып киткән кешеләр оныкларын, балалары белән кайта. Бала чагыбызда уйнаган җиребездә бүген безнең нәсел дәвамчыларыбыз рәхәтләнеп тау шуа. Без исә бала чакка кайтабыз. Кечкенә авыл булсак та, Сәрдегәннән чыккан егетләр безне елга ике тапкыр очраштыра. Елның беренче көнендә Тау бәйрәсендә күрешсәк, июль аеның соңгы шимбәсендә “Чишмә” бәйрәменә җыелабыз. Шунысы сөендерә, ике бәйрәмгә дә бу хакта ишетеп, төрле авыллардан кунаклар килә.

Кызыклы яңалыкларны күзәтеп бару өчен безнең МАХ каналына кушылыгыз. 

‹ ›

❮

❯