Үзең дә йомырка җыярга чыгарсың!

«Шәһри Казан» газетасының 2026 елның 22 апрель санындагы “Кызыл йомырка – Кояш билгесе” дигән мәкаләдә татар авылларында да 1 май иртәсендә буялган йомыркалар җыеп йөрү гадәте турында язган идем инде мин. 

Вакыт чаба, 1 май да узып китте. Балалар полиэтилен капчыкларын тотып, өйдән-өйгә йөрде. Мондый гореф-гадәт Балык Бистәсе, Мамадыш, Питрәч, Теләче районнарында бар. Әлки районында балалар буялган йомырканы 1 майда түгел, ә Пасха көнендә җыялар икән, ул әлкилеләрдә “Кыткытыйк” дип атала. Балалар урам буйлап: «Кыткытыйк, әби-бабай өйдәме, бер йомырка бирәме», дип такмаклап йөриләр икән. 

Бүген инде хуҗабикәләр балаларга буялган йомырка гына түгел, шоколадлар, конфетлар һәм җимеш сулары да бирә. Шул тәмле ризыкларга кызыгып, капчык тотып, үзең дә йомырка җыярга чыгып китәрсең, билләһи.

Балык Бистәсе районындагы Балтач авылында да балалар сөенешеп, йомырка җыйды. Әниләре яки апалары сабыйларны кулларына күтәреп йөрде. Бик хуп, сабыйлар горыф-гадәтләрне хәтерләп калдырсыннар.