Казанда үтәчәк Мәүлид бәйрәмендә хаҗга юлламалар уйнатыла

Татарстан мөфтиятенең аппарат җитәкчесе Ирек Арсланов журналистларга белдергәнчә, республикадагы барлык 1608 мәчеттә дә, мәүлид ае уңаеннан, бәйрәм чаралары узачак. Ә иң зур чара Иске Татар бистәсендә татар дин галиме Шиһабетдин Мәрҗани һәйкәле янында оештырыла.

– Башка елгы чаралардан аермалы буларак, быелгы шәһәркүләм Мәүлид бәйрәмендә урамда сәхнәдә театральләштерелгән тамаша күрсәтеләчәк. Бәйрәм сәгать көндезге 15.00тә башлана, – дип хәбәр итте ул. 

Чарага Россиянең танылган нәшид башкаручылары – "Нәшидүл ислам" төркеме җырчылары да чакырулы. Шунда ук танылган татар артистлары һәм коллективлары да дини кануннар кысаларында үзләренең иҗади номерлары белән чыгыш ясаячак. Мәдәни программадан тыш, сәхнәдә хәзрәтләр вәгазьләр сөйләячәк. 

Бәйрәмнең иң күңелле мизгеле исә хаҗга – ике һәм гомрәгә бер юллама уйнату булачак. Бүләк уйнатуда бәйрәмгә килгән һәр кеше, хәтта балалар да катнаша ала. 
– Моның өчен чарага иртәрәк килергә тырышырга кирәк. Барысы 5 мең билет әзерләнде. Килгән һәр кешегә бушка бер билет бирелә. Аның яртысын ертып алып, махсус барабанга саласыз, калган яртысы үзегездә кала. Бәйрәмдә ахырында шул билетлар уйнатылачак. Җиңүчеләргә хаҗга бару өчен сертификат тапшырылачак, – диде спикер.