Равил хәзрәт Гайнетдин: «Безнең төп бурыч - үзебезгә алмаш әзерләү»

Россия мөселманнары диния нәзарәте рәисе Равил хәзрәт Гайнетдин «Милли тормыш һәм дин» татар дин әһелләре җыенының пленар утырышында бүген имамнарның төп бурычы дип үзләренә алмаш әзерләүне һәм яңа буынның тәрбиясен рухи-дини мирасыбызга таянып оештыруны атады.

"Үземә еш кына шундый сорау бирәм: без үзебездән соң киләчәк буыннарга нәрсәләр калдырырбыз? Безнең буын дин әһелләренә ХХ гасыр азагында сүнеп барган дин учагын яңадан дөрләтү вазыйфасы насыйп булды. Инде XXI гасырның да бер чиреге үтеп китте. Бу тарихи дәвердәге төп бурычыбыз ул – үзебезгә алмаш әзерләү, яңа буынның тәрбиясен бай булган рухи-дини мирасыбызга таянып оештыру. Бүген төп мәсләгебез яңа мәдәни һәм дини көчләр үстерү, аларны аякка бастыру. Бу яңа буын безнең дини байрагыбызны алга таба күтәреп барачак", - диде ул.

Бу юнәлештә, аныңча, төп ярдәмче дөньяның фәнни үсеше-алгарышы, шул исәптән ясалма фәһем булырга тиеш. "Яңа технологияләр бирә торган мөмкинчелекләрне нәкъ менә фикри һәм рухи үсешебез өчен куллануыбыз зарури. Татарларның киләчәген тәэмин итүнең бердәнбер юлы – ватаныңны, милләтеңне сөю, иманны ныгыту, рухи куәтебезне арттыру һәм фәнгә таяну", - диде Равил Гайнетдин.