Татарстан мөфтие: «Безнең кулъязма Коръәнне эталон дип атыйлар»

"Быел Габдулла Тукайның тууына 140 ел. Чыгышымны аның сүзе белән башларга рөхсәт итегез. “Васыятем” дигән шигырендә шундый юл бар: “Күр, нә рәсмә тулган иман берлә Коръән садремә!” Ягъни: “Күрегез, күңелем иман һәм Коръән белән тулган”. Татар халкы өчен Тукай бик олы шәхес, димәк, аның бу сүзләрен милләтебезгә васыять итеп кабул итәргә була. Башкача әйткәндә, Тукай үзенең күңелен ничек Коръәнгә багышлаган, татарлар да Аллаһның изге сүзләрен шулай яратырга тиеш. Хәдистә болай диелә: “Аллаһы Тәгалә Коръән сәбәпле кавемнәрне күтәрә, һәм калганнарының дәрәҗәсен төшерә”. Шул сәбәпле Татарстан диния нәзарәте бүген Коръәнгә бихисап хезмәтләр куя. Хафизлар тәрбиялибез, Коръәнне әзерләп бастырабыз, аны тәрҗемә итәбез. Казанда чыккан мүсхәфләр халыкара стандартларга туры килә. Безнең тәҗрибәне хәзер чит илләрдә дә файдаланалар, ә безнең кулъязма Коръәнне эталон дип атыйлар", - диде ул. 

Билгеле булганча, нәзарәт имамнарга истәлек итеп кулъязма Коръәнне бүләк итте. "Сез – бу мүсхәфне кулга алучы беренче кешеләр. Казан кулъязма Коръәне – хәзерге Россия өммәтенең соңгы фәнни-дини казанышларының берсе, чөнки ул Россия-мөселман каллиграфия мәктәбенең уникаль традицияләрен торгыза. 

Казан Коръәне 19 төрле мүсхәфкә таянып язылды. Эшләгәндә без шулай ук Коръәнне язу һәм төзү буенча 11 чыганакка мөрәҗәгать иттек, шул исәптә Мәрҗани һәм Муса Бигиев хезмәтләренә дә. Башка бүгенге мүсхәфләр гадәттә ике генә чыганакка таяна.  

Казан мүсхәфенең милли үзенчәлекләре дә бар. Аның битләре Татарстан байрагы төсләре белән бизәлде. Ә сәҗдә аятьләре Сөембикә манарасы билгесе белән күрсәтелә", - диде мөфти.