Һәрбер хыял чынга ашарга хокуклы: 25 апрель – 2 майга йолдызнамә

Кучкар (21 март – 20 апрель)
Кеше бәхет ачкычын гомер буе эзли, кемдер таба, кемдер кулларын төшерә. Тик сез алар рәтеннән түгел. Бәхет ачкычы сезнең янда, тизрәк табыгыз да, нурлы киләчәккә атлагыз.

Үгезбозау (21 апрель – 20 май)
Кеше үз тирәлеген үзе билгели. Безнең һәрвакыт ике юл бар: билгеле бер кеше белән аралашырга яисә аралашмаска. Кара урманга килеп кердең икән, урман түгел, син үзең әлеге сукмак буенча кереп киткәнеңә җаваплы.

Игезәкләр (21 май – 21 июнь)
“Әйткән сүз, аткан ук,” диләр. Шуңа матур “уклар” гына атарга тырышыгыз. Алар кешенең йөрәкләренә кереп, күңелләрен җылытсын һәм нур өстәсен. Яхшы кәеф таратучы “почтальонга” әверелегез.

Кысла (22 июнь – 22 июль)
Әгәр дә кеше сезне тыңламый яисә аңламый икән, үз дөреслегегезне дәлилләргә кирәкми. Ябык ишеккә күпме генә шакыма, ул бары ачылмаячак. Бу сез гаепле дигән сүз түгел, ә дөрес “ишеккә” шакымауны гына аңлата.

Арыслан (23 июль – 23 август) 
Кеше җәмгыяте уйларны укый торган машина уйлап тапса, сезгә әлеге машинадан йозак уйлап табарга кирәк булачак. Арысланнарның башында, бер минутта уйлар яктылык тизлеге белән алмаша. Алар үзләре дә аларны тотып өлгерми. 

Кыз (24 август – 23 сентябрь)
Тормыш математика мәсьәләсе сыман: бер җирдә хата җибәрдең икән, нәтиҗәдәге җавабы да дөрес булмаячак. Артка борылып, кайда плюс урынына минус куйганыгызны тикшерегез.

Үлчәү (24 сентябрь – 23 октябрь)
Һәрбер хыял чынга ашарга хокуклы. Ә тиздән моның өчен яңа мөмкинлек килеп чыгарга мөмкин. Бар кыюлыгыгызны җыеп, аны кулланыгыз. Мондый вакыйга меңгә бер булуы ихтимал.

Чаян (24 октябрь – 22 ноябрь)
Сез бу көннәрдә иң матур һәм иң сөйкемле кеше. Тик бер “ләкин” бар. Хәер, юк, дөрес түгел. Бернинди “ләкин” дә юк. Сез бу ялларның төп йолдызы. Төп вазифагыз - балкыгыз гына. 

Укчы ( 23 ноябрь – 21 декабрь )
ИГЪТИБАР! Укчыларны ялларда яхшы хәбәрләр көтә. Туганнарыгызны җыеп, бер матур гаилә киче уздырыгыз. Күбрәк кеше җыелган саен, яхшырак. Бер матур хатирә булып калсын. 

Кәҗәмөгез (22 декабрь – 20 гыйнвар)
Тирә-юньдәгеләр махсус рәвештә сезнең нерв кылларыгызда уйный сыман. Алар уйный-уйный остарган, хәтта бер көйгә дә ияләшкән. Болай озак дәвам итә алмас, туктатырга кирәк бу “уенны”.

Сукояр (21 гыйнвар – 18 февраль)
Сез үзегезнең планыгыз буенча төгәл барасыз. Тик барысы да сез уйлаганча барып чыкмаячак... Чөнки нәтиҗәсе сез уйлаганнан да, “татлырак” булачак. Җимешләрен җыярга әзерләнегез.

Балык (19 февраль – 20 март)
Балыклар, киләсе тукталыш “Якты киләчәк”. Үткәндәге кешеләрне, кирәкмәгән истәлекләрне ташлап калдырыгыз, алга бары якын кешеләрегезне генә алыгыз. Хәерле юллар сезгә!

Фото: ru.freepik.com