“Ялгыш тоелды” дип кенә күз йомып китә алмассыз: 16-22 гыйнварга йолдызнамә

Кучкар (21 март – 20 апрель)
Күңелегез нечкәргәнен тоярга мөмкинсез, вак-төяккә дә игътибар итә башларсыз. Мондый халәттә үпкәләүләрдән ерак торыгыз, чөнки барысы да сез уйлаганча катлаулы булмаска мөмкин.

Үгезбозау (21 апрель – 20 май)
Эштә сезне күрерләр, сүзегезне тыңларлар. Бу еллар буе тырышып, җыеп килгән тәҗрибәгезнең лаеклы бәяләнү билгесе. Гаилә сорауларында сабырлык сорала. Атна ахырында күңелле очрашу ихтимал.

Игезәкләр (21 май – 21 июнь)
Сезне балалар яисә оныклар белән бәйле шатлыклы вакыйга көтә. Эштә зур үзгәрешләр булмас, әмма тотрыклылык та күңелне тынычландырыр. Барысы да сез теләгәнчә бара, шуңа шатланыгыз.

Кысла (22 июнь – 22 июль)
Күңелегез сезне үткәннәргә алып китәргә мөмкин. Ләкин анда озакка чумып калмагыз, иң бәхетле һәм кыйммәтле көн – бүгенге көн. Якын кешенең ярдәме сизелер, ул сезгә акчага бәйле вак мәсьәләне хәл итәргә булышыр.

Арыслан (23 июль – 23 август)
Балалар белән бәйле сөйләшүдә җитдилек сорала. Истә тотыгыз: иң яхшы тәрбия – үрнәк күрсәтү. Сөйләгәннәр истә калмаска мөмкин, ә күрсәтелгән үрнәк күңелдә урын алачак. 

Кыз (24 август – 23 сентябрь)
Сүз, хәбәр, шалтыратулар күп булачак. Кем белән ничек, нинди тонда сөйләшүегез бик мөһим, шуңа сүзләрне уйлап кулланыгыз. Мәхәббәт өлкәсендә җылылык артыр: бүләкләр күп, игътибар көчлерәк булыр. 

Үлчәү (24 сентябрь – 23 октябрь)
Көтелмәгән хәбәр икенче атнага корган планнарыгызның агышын үзгәртергә мөмкин. Башта аптырап калырсыз, ләкин аннары файдалы ягын күрерсез. Мәхәббәт өлкәсендәге киеренкелекне гади утырып сөйләшү чишәр.

Чаян (24 октябрь – 22 ноябрь)
Яңа вазифалар белән, зур җаваплылык та килер. Эштә сезгә өмет багларлар, һәм сез аны һичшиксез аклый алачаксыз. Кар сыман көтелмәгән җирдән эш төшсә, гаҗәпләнмәгез.

Укчы (23 ноябрь – 21 декабрь)
Икеләнү алдында торасыз, үзегезгә ярдәм итәр өчен, дәфтәргә әлеге эшне “эшләсәм” һәм “эшләмәсәм” нәрсә булырга мөмкин дигән исемлек төзегез. Күз алдында торгач, сайлавы да җиңелрәк булыр.

Кәҗәмөгез (22 декабрь – 20 гыйнвар)
Ялларда юлда йөрүләр, кунакка бару яки кунаклар кабул итүләр күп булуы ихтимал. Шуңа күрә тәмле күчтәнәчләр, чәйләр киштәсен тутырып куегыз. 

Сукояр (21 гыйнвар – 18 февраль)
Эчке тоемлавыгыз, көчегез үзе турында очкын сыман түгел, ә салют сыман искә төшерер. “Ялгыш тоелды” дип кенә күз йомып китә алмассыз, күңел тавышыгызга колак салырга туры килер.

Балык (19 февраль – 20 март)
Атна башы бераз киеренке булып тоелса да, ялларга таба әлеге авырлыкның эзе дә калмас. Өйдә якын кешегезнең киңәше урынлы булыр. Акчага кагылышлы мәсьәләдә артык кыю адым ясамагыз.