Тормыш уен түгел: 19-25 ноябрьгә йолдызнамә

Кучкар (21 март – 20 апрель)

Йолдызлар упкынга ташланмаска киңәш итә: башта уйлагыз, аннары адым ясагыз. Барысына да берьюлы тотыну, ахырдан вакыт җитмәүгә китерергә мөмкин.

Үгезбозау (21 апрель – 20 май)

Бу атна эшләрдә дә, уйларда да тәртип урнаштыру өчен туры килә. Финанс мәсьәләләре игътибар таләп итәчәк, ләкин хафага бирелергә кирәкми: барысы да хәл ителәчәк. Ә шәхси тормышта барысы да тыныч булачак.

Игезәкләр (21 май – 21 июнь)

Шуны истә тотыгыз: олыгаю күңел ачудан, мавыгулардан баш тартырга кирәк дигән сүз түгел. Сез үз кәефегезгә үзегез хуҗа. Шуңа ара-тирә тормыш мәшәкатьләреннән арынып, кәефегезне күтәрә торган эшләр эшләгез.

Кысла (22 июнь – 22 июль)

Елмаю тормышны озынайта икән, сез һичшиксез озын гомерле булырга тиешсез, чөнки һәрбер вак-төяктән дә шатлык та табып, уңай яклар эзли беләсез һәм бу сокланырлык сәләт!

Арыслан (23 июль – 23 август)

Үзегезне шатландырасыгыз килсә, 8 сәгатьлек, сәламәт йокы режимы бүләк итегез. Һәр көн саен аз йоклау “җыелу” сәләтенә ия һәм ул берәр көн шартларга мөмкин. Ә бу кирәкме сезгә?

Кыз (24 август – 23 сентябрь)

Әйтерсең лә, сезнең бөтен нәселегездәге җитдилек бергә җыелып, сезнең холыкка күчкән. Мөһим эшләрне башкарганда бу бик кирәкле сыйфат, ләкин артык җитди булып, гади әйберләрне катлауландыра күрмәгез.

Үлчәү (24 сентябрь – 23 октябрь)

Бәхет өчен күп кирәкми, бәхет өчен иртә белән телефонда «Бүген эшкә килеп йөрмә, сиңа ял бирелә» дигән хат та җитә. Бәлки бу хыял кайчандыр булса тормышка ашар, ләкин бу атнада түгел.

Чаян (24 октябрь – 22 ноябрь)

Бу көннәрдә сезгә дөнья, вакыт туктаган сыман тоелырга мөмкин. Бөтен эшләр бер мизгелдә мәгънәсен югалтыр. Бары тик сез һәм сезнең фикерләр. Бу “тукталыштан” файда күрергә тырышыгыз.

Укчы (23 ноябрь – 21 декабрь)

Акча үзеңә сарыф ителгәндә, җиңел җибәрелә. Шуңа күрә үзегезгә акча жәлләмәгез. Үзегезне бер-ике матур әйбер алу, берәр чарага барып кайту белән куандырыгыз. Сез бит моңа лаеклы.

Кәҗәмөгез (22 декабрь – 20 гыйнвар)

“Тормыш мәшәкатьләрен уендагы сыман паузага куеп булып торса иде ул”, – дип хыяллана кайвакыт Кәҗәмөгезләр. Ләкин тормыш уен түгел, андый функция дә юк. Шуңа сорауларны үзегезгә хәл итәргә туры киләчәк.

Сукояр (21 гыйнвар – 18 февраль)

Әгәр дә начар гадәтләрегездән арынырга телисез икән, аны гомумән алып ташларга түгел, ә үзгәртергә кирәк. Әлеге гадәткә сарыф ителгән вакыт һәм көчне үзегез өчен файдалырак нәрсәгә алыштырыгыз.

Балык (19 февраль – 20 март)

Моңа кадәр үз-үзегезгә булган ышаныч үзенең иң югары ноктасына җитәр. Нәрсәгә генә тотынсагыз да “Мин булдырам” девизы колакларыгызда яңгырап торыр. Сезгә молодцы диясе генә кала.