Үзегезгә артык кырыс булмагыз: 1 – 7 июльгә йолдызнамә:

Кучкар (21 март – 20 апрель)
Йөрәгегез соңгы вакытта акыл белән киңәшләшергә онытып җибәрергә мөмкин. Әмма бу юлы мәхәббәт сезне ялгыш юлга алып бармас. Гаиләле Кучкарлар өйдәге җылылыкны яңадан ачар, ә ялгызларның күңеле көтмәгәндә кемгәдер тартылачак. 

Үгезбозау (21 апрель – 20 май)
Күңелегез бер якка, җаваплылык икенче якка тартыр. Шулай да бу көрәштән җиңүче булып чыгарсыз. Көндәлек бурычлар арасында үзегез өчен дә вакыт табарга өйрәнегез. 

Игезәкләр (21 май – 21 июнь)
Кемдер сезнең турында сөйләшер, кемдер фикерен әйтер, әмма бу юлы сезне аларның сүзләре кызыксындырмас та. Дөрес юлда баручы кеше һәрвакыт кемгәдер ошамый. 

Кысла (22 июнь – 22 июль)
Соңгы вакыттагы мәшәкатьләрдән соң өйдәге җылы мохит аеруча кадерле тоелыр. Якын кешегездән ишетелгән бер җөмлә хәтта бөтен атнага җитәрлек көч бирергә мөмкин. 

Арыслан (23 июль – 23 август)
Сезне күрмиләр дип уйласагыз да, хезмәтегез күпләрнең күз алдында. Бу атнада мактау сүзләре ишетүегез ихтимал. Тик артык масаеп китәргә кирәкми. Иң матур җиңүләр тыныч кына килә.

Кыз (24 август – 23 сентябрь)

Планнар төзергә яратасыз, әмма тормышның үз сценарие дә бар. Алардан курыкмагыз. Кайчак ябылган ишекләр яхшырак юлларга алып чыга.

Үлчәү (24 сентябрь – 23 октябрь)
Кешеләрнең күңелен күрергә тырышып, үзегезнең теләкләрне онытып җибәрмәгез. Күңелегезгә рәхәтлек китергән шөгыльләр яңа көч өстәр. Үзегезне бәхетле итү дә мөһим.

Чаян (24 октябрь – 22 ноябрь)
Сез сер сакларга оста, әмма йөрәктәге бөтен уйларны бикләп тоту кирәкми. Кем беләндер эчкерсез сөйләшү күптәнге авырлыкны җиңеләйтер. 

Укчы (23 ноябрь – 21 декабрь)
Юллар, очрашулар, яңалыклар — барысы да сезнең тирәдә әйләнер. Көннәр гадәттәгедән кызыграк узарга мөмкин. 

Кәҗәмөгез (22 декабрь – 20 гыйнвар)
Эшләрегез алга барыр, ләкин сез алардан күбрәкне көтәрсез. Үзегезгә артык кырыс булмагыз. Кайчак туктап, инде башкарылган эшләргә дә сөенә белергә кирәк. Уңыш сез уйлаганнан якынрак.

Сукояр (21 гыйнвар – 18 февраль)
Башыгызда шулкадәр күп фикер булыр ки, кайсыннан башларга белми аптырарсыз. Иң яхшысы — иң мөһименнән башлау. Яңа идеяләр арасында чыннан да игътибарга лаеклары табылыр. 

Балык (19 февраль – 20 март)
Йолдызлар сезгә күңел кушканны тыңларга киңәш итә. Башкалар нәрсә әйтер дип куркып яшәүдән файда юк. Бу атнада йөрәгегез дөресрәк киңәш бирер.