Беләме-белмиме – барысы да яза... (Юмореска)

– Нишләп утырасың анда вакыт уздырып? – дип кызыксынды хатыны. – Ичмасам, ял көне өй эшләрендә ярдәм итәрсең дип өметләнгән идем.
–  Әй, хатын, син берни аңламыйсың ла. Менә хәзер кемне карама – язучылыкка тотынды. Беләме-белмиме – барысы да яза. Мин алардан ким түгел, ләбаса!
– Соң, син нәрсә турында язмакчы буласың инде, ничә еллар буе циркта эшләп: маймыллар, филләр артыннан җыештырганыңнымы?
- Юк шул, җаныем, мин шундый мәкалә язам, шундый!..
- Нинди? – дип, көлемсерәп куйды хатыны.
- Үзең дә шаклар катырсың әле.
Хатыны, берни дәшмичә, кер юарга тотынды.
Хәбиб, башына уй кермәгәч, малаеның бүлмәсенә керде.
- Ничек, улым, укулар барамы? Әдәбияттан нәрсәләр үтәсез?
- Бер дә элек ишетелмәгән язучының әсәрләрен укыйбыз. Нәрсә язганы да аңлашылып бетми шунда...
– Кая, ниләр язалар икән, – дип, кызыксынды атасы.
Карап чыккач, аның башына бер уй килде: “Хәзер язучылар күп. Кем, нәрсә язганын күзәтеп бетерүче дә юк. Шулар арасыннан мин дә үземә яраклы нәрсә таба алмаммы икән?”
– Улым, син миңа бу китабыңны биреп тор әле, - диде дә Хәбиб, үз бүлмәсенә кереп китте.
– Тә-ә-к, нәрсәдән башлыйм икән соң? Әһә, менә моннан берничә җөмлә алырга була... Менә тагын яраклысы бар. Әй, мин бу китаптагы язучыларның барлы-юклы фикерләрен алып, бер әсәр язып чыгара алам бит...
Кич җиткәндә, Хәбибнең кыска гына әсәре барлыкка килде.
– Мә, хатын, укы! – дип, горурланып кәгазь битләрен күрсәтте ул хатынына.
Анысы укып чыкты да:
– Бер дә син алай яза белерсең дип ышанмаган идем. Булдырасың икән бит!
– Утыргач, уйлагач, була инде ул, – дип, серле генә улына карап әйтте Хәбиб.
Аннары, аны аерым чакырып:
– Улым, синең тагын нинди китапларың бар? Бир әле миңа. Кирәге чыгар...
– Әй, әти! Китап актарып утырганчы, син интернетка кер. Андагы материал!.. Күңелең нәрсә тели, шуны таба аласың. Мин дәресләргә дә шуннан гына әзерләнәм. Вакыт уздырып, баш ватып утырмыйм.
– Ну, улым, маладис та үзең, маңгаең киң икән! Болай булгач, мин кыска әсәрләр белән маташмам – романга тотынам! Җаен таптым.

Гүзәл Сөнгатуллина

Фото: https://pixabay.com/ru