Ана назын тоеп, егетләребез аңа «Мама Лена» дип эндәшә

Сүзебез – Балтач районы Норма авылында яшәүче, олы яшьтә булуына карамастан, махсус хәрби операция зонасындагы егетләрнең хәлләрен белеп торучы, аларның үтенеч-гозерләрен тыңлап, фронтка гуманитар ярдәм илтүче Елена Вәлиева турында.

- Луганск, Донецк госпитальләренә булышам. Бирегә дарулар, инвалид арбалары, тәм-томнар, киемнәр һәм башка бик күп төрле кирәкле әйберләр китерәм. Тәмнүшкәләр да алып барам. Бер кәнфитне дүрткә дә бүлеп ашыйлар җаныкайлар, – ди игелекле ханым. - Безнең Балтач халкы бик тырыш, ярдәмчел, хәрбиләргә ярдәмне мулдан әзерлиләр. Үзем авырлыкны бик күп күрдем, мохтаҗлар хәлен яхшы аңлыйм, шуңа күрә ярдәм итәргә телим, йөрәгем шулай куша. 
Елена биш машина, күп санда мотоцикл, гомумән, яу кырындагы егетләр сораган һәр җайланма, кирәк-яракны табып, ремонтлап алгы сызыкка илтеп куйган. 

– Егетләребезне саклап, яклап ярдәм итү, безнең максат һәм бурыч! Ә бу эшләр һәммәбезнең күңел халәте белән башкарыла. Һәркемгә үрнәк булырдай кызларыбыз, егетләребез бар! Үзләре ярдәмгә мохтаҗ булсалар да, күңелләре изгедә аларның! Егетләребезгә мөмкинлекләре чикле булган егет-кызларыбыз чәй ясап тутыралар, ипи турап киптерәләр, дарулар алалар, хәтта окоп шәмнәре дә ясыйлар. Игелекле ниятләрен тормышка ашырып, хәрбиләргә, яу кырында яраланып хәзер госпитальдә дәваланучыларга, ятимнәргә дә булышып торалар.

Юл газабы – гүр газабы диләр, Елена апа берничә тарафдары белән Луганск, Донецк ягына 20дән артык тапкыр барган. 
– Фаҗигале хәлләр дә була. Юл ерак бит. 4 мең чакрымны йөреп кайтырга кирәк. Хәйран хикмәтләр белән очрашабыз, бик сак булырга кирәк. Берсендә без килеп җитәрәк кенә ягулык салу станциясен шартлаттылар. Дрон куганы да бар. Элек керә торган җирләргә хәзер керә алмый башладык, дроннар бик күп оча, – дип ачына ул. – Андагы балалар да, хәрбиләр дә – барысы да миңа бик кадерлеләр, үземнекеләр. Шунда барып кайту, аларны күрү, ярдәм итү минем өчен шулкадәр зур бәхет! Егетләрне искә төшергән саен бугазыма төер тыгыла.
Күңел җылысын, ана назын тоеп, егетләребез аңа «Мама Лена» дип эндәшә. Отпускка кайтсалар да Елена апа янына килеп китмичә калмыйлар.

Азалия Вәлиуллина.