Раил Биктаһиров йөрәк әрнүе белән улы Салманның һәлак булуы турында искә ала

Фаҗига 9 июньдә Лаеш районының «Аэросити-2» торак комплексында була. Башлангыч мәгълүматлар буенча, Салман самокатта йөргәндә йөк машинасы кузовыннан чыгып торган металл баганаларга килеп бәрелә. Алган тән җәрәхәтләреннән үсмер урында ук җан биргән.

Раил социаль челтәрдәге сәхифәсендә  язуынча, ул вакытта баганалар кисәтүче билгеләр, конуслар яки башка саклык чаралары белән уратып алынмаган була. Фаҗига булганнан соң гына ЮХИДИ хезмәткәрләре кисәтү билгеләре куйган, дип белдерә ул.

Әти кеше фикеренчә, кояш яктысында баганалар күк белән кушылып күренгән, шуңа күрә аларны бик якын килгәч кенә шәйләп булган. Аның сүзләренчә, улы шлем кигән була, әмма бу фаҗигадән коткара алмый.

Иң авыры, ди Раил, КаМАЗ йөртүченең фаҗигадән соң аның гаиләсендә булган салкын мөнәсәбәте күңелне тетрәндерә.

Раил дүрт көн дәвамында гафу үтенү көткәнен, әмма моны күрмәвен әйтә. Соңрак, җинаять эше кузгатылачагы билгеле булгач кына шофердан шалтырату булганын, әмма гаепне тану һәм гафу сорау яңгырамаганын искә ала.

Аның сүзләренә караганда, башта ул тыныч юл белән килешү мөмкинлеген дә кире какмаган. Ләкин соңыннан каршы якның гаепне кире кагуы һәм җаваплылыкны Салманның үзенә күчерергә омтылуы турында белгәч, моны инде принцип мәсьәләсе дип кабул иткән.

«Мин кемнедер катырак җәзага тарттыруны теләмим. Мин бары тик гаделлек эзлим», — дигән фикерен җиткерә Раил Биктаһиров.