Үги балаларга түзәр хәлем калмады: китәсем килә!

Рамил минем белән аерылышканнан соң ике сабые — игезәк уллары Илназ һәм Илнур белән ялгыз калганын яшермәде. Без танышканда малайларга дүрт кенә яшь иде. Аларны вакытлыча карап торырга апасы ризалашкан, әмма мин аның белән бер фатирда яши башлауга ук, балаларны үзебезгә алып кайттык.

Бу адымның никадәр авыр булачагы турында уйлап та карамаганмын икән. Ирем көченнән килгәнчә ярдәм итте, ләкин бөтен йорт эше, тәрбия мәсьәләләре минем өскә ауды. Бер айдан күзләрем тартыша башлады. Шуннан соң гына няня яллый алдык, хәлем бераз җиңеләйде. Кайвакыт иремнең сеңлесе дә булышкалады, тик бик сирәк килде.

Рамил үзе искиткеч яхшы ир һәм әти булды. Ялларда гел өйдә, балалар белән кайнашты. Әмма миңа аның игътибары җитмәде диярлек. Мин аңа кияүгә чыкканда барысын да аңлый идем инде. Балалар белән эш тәҗрибәм бар (лагерьда әйдаман булдым), шуңа күрә алар белән уртак тел таба алырыма шикләнмәдем. Үги ана роленең җиңелләрдән булмаячагын белсәм дә, үҗәтләнеп тотындым.

Өч ел шулай яшәдек. Малайларны бакчага, аннары репетиторларга йөрттем, быел менә мәктәпкә керергә торабыз. Тик нервыларым какшый башлады бугай. Бу балаларны күңелем кабул итми. Алар мине тыңламый, бөтен нәрсәне ватып-җимереп кенә йөриләр.

Акча җитмәү проблемасы да килеп басты. Нянядан баш тарттык, мине эштән кыскарттылар. Хәзер өйдә генә утырам, заказга тортлар пешереп аз-маз акча табам, ләкин ул гына тормышны тартып бара алмый. Финанс кыенлыклары һәм стресс аркасында ирем белән аралар суынды. Ә бит мин аны әле дә бик яратам! Ул да тырыша, карьерасында югарырак баскычка күтәрелде, тик эше тагын да артты һәм без аны бөтенләй күрмибез диярлек.

Китәсем килә. Минем үз фатирым бар, шунда качып китә алам. Ләкин яраткан кешемне ике бала белән ялгызын борчу-мәшәкатьтә калдырып китү оят. Ике ут арасында бәргәләнәм. Малайлар хәзер минем өстә ачу һәм нәфрәт кенә уята.

Ирем бер талашканда аларны әбисенә — үзенең әнисенә авылга кайтарып торырга тәкъдим итте. Мин риза, тик мин китсәм, алар анда гомер буе торырлар микән? Кем белән калырлар?

Үземнең дә балабыз булуын бик теләгән идем, тик насыйп булмады. Сәламәтлегебез дә бар югыйсә. Гел борчылып, стресста яшәү сәбәпледер дип уйлыйм. Нишлим? Ташлап китимме, әллә түзәргәме?

Нурия, Казан
Фото нейрочелтәр ярдәмендә әзерләнде