“Хезмәт хакы керү белән уенга сала”: уен колына әверелгән егеткә ничек ярдәм итәргә

Тыныч кына яшәгәндә, әни кеше өчен улының телефонга “кереп югалуы” иң зур борчылу булган. Башта ул моңа әллә ни игътибар итмәгән. “Эштән арып кайта, бераз ял итәдер”, – дип уйлаган. Әмма тора-бара телефондагы уеннар гадәти мавыгу түгел, ә чын бәйлелеккә әйләнә башлаган.

Улына 26 яшь. Эше бар, акчасын да үзе эшләп ала. Әмма хезмәт хакы керү белән телефондагы уеннарга акча сала башлый. Башта вак кына суммалар башланса, алга таба “бүген отармын”, “аз гына калды”, “акчаны кире кайтарам” дигән өмет белән тагын һәм тагын акча күчерә. Кайчак азрак откан чаклары да булган. Нәкъ шул “җиңү хисе” аны тагын да ныграк бәйләгән.

Әнисе сөйләшеп тә карый, ачулана да, үгетли дә. “Улым, бу бит яхшыга алып бармый”, – ди. Әмма улы: “Мин теләсә кайсы вакытта туктый алам”, – дип җавап кайтара икән. Тик чынбарлык бөтенләй башкача була.

Эштән кайта да – телефон. Ашаганда да – телефон. Йокларга ятканчы да – телефон. Гаилә белән сөйләшүләр сирәгәя, дуслары белән аралашуы кимегән. Әнисенең иң курыкканы – улының күзләрендәге битарафлык. Элек шаяртып сөйләшкән, нәрсәдер планлаштырган егет хәзер бөтен дөньясын кечкенә экран эчендә күрә башлый.

Бервакыт әнисе улының бурычка акча алганын белеп ала. Шунда инде ул моның гади уен түгеллеген аңлый. Чөнки мондый бәйлелек кешенең психикасына да, финанс хәленә дә, гаилә мөнәсәбәтләренә дә суга.

Әни кеше бүген дә улы өчен борчыла. Әмма өметен өзми. “Бала нинди яшьтә булса да – ул бала булып кала икән”, – ди ул күз яшьләре аша.
Киңәш бирегез, бу әни кешегә нишләргә? 

Алинә Гыйләҗева