Казанда Рауис Гәрәев һәм Сибгат Хәким урамнарында ике яңа мәктәп барлыкка киләчәк

Шәһәрдә мәктәпләр төзү өчен 30 мәйданчык резервланган, алар уку йортларына ихтыяҗ зур булган районнарда урнашкан, диде мэр. «Мәктәпләр җитмәү турында безгә ата-аналар яза, бу хакта район башлыкларыннан, мәгариф идарәсеннән дә беләбез. Без ел саен ике-өч мәктәп төзибез һәм Идел буе федераль округында мәктәпләр төзү буенча абсолют лидер булып торабыз, бары Мәскәү һәм Санкт-Петербург кына бездән алда бара», – дип билгеләде Илсур Метшин һәм бер мәктәп төзелеше якынча 1,5 млрд сум тора дип өстәде.

Шулай ук быел Казанда өч мәктәпне капиталь ремонтлау планлаштырыла, дип хәбәр итте Казанның социаль өлкә учреждениеләрен карап тоту һәм аларга хезмәт күрсәтү департаменты җитәкчесе Петр Королев. Шулай итеп, 131 нче номерлы лицейда азык-төлек блогының фундаментын һәм диварларын ныгыту, ашханәне капиталь ремонтлау, 173 нче номерлы мәктәптә һәм 18 нче номерлы гимназиядә түбә, фасад, инженерлык коммуникацияләрен һәм нигез ташларын капиталь ремонтлау планлаштырыла.

2022 елда мәдәни мирас объектларын капиталь ремонтлау программасы буенча 73 нче һәм 98 нче мәктәпләрдә капиталь ремонт уздыру планлаштырыла. «Конкурс процедуралары бара, подрядчы оешма белән контракт апрель аенда төзелер дип көтелә», – дип хәбәр итте Петр Королев.