Заманага аваздаш спектакль

Спектакльнең төп герое Гөлнара барбершопка тышкы кыяфәтен үзгәртергә килә. Беренче мәхәббәте хакына. Ул ничә еллар күңелендә кадерләп саклаган сөйгән кешесе өчен акчасын да кызганмый, тышкы кыяфәтен тулысынча үзгәртүдән дә курыкмый. Тик ачы хакыйкать аның күзләрен ача, күктән җиргә егылып төшәргә мәҗбүр итә. Шул вакытта гына кул сузымы ераклыгында гына булган, аны гомере буе яраткан Салаватны күрә. 

Спектакль хисләрнең сафлыгы, кешеләрнең кадере турында. Идеясе яхшы, тик комедиянең ничек тәмамланасын алдан ук белеп була. Аннан тирән фәлсәфә эзләргә кирәкми. Шулай ук Гөлнараның үзгәрүе дә бик үк уңышлы димәс идем.  Күңел матуррак киемнәр көтте. Әлбәттә, режиссер аны үзенчә күзаллаган, мин дә нибары үз фикеремне генә җиткерәм. Спектакль тәмамлангач та, күңел ышанмады, дәвамын өмет итте. Ниндидер вакыйгалар үрелеше, көтелмәгән борылышлар җитми калды. Бу язучыдан бәлки тормыйдыр да, чөнки заказга язылган. Ә артистлар үз эшләрен җиренә җиткереп башкарды, афәрин!