Җәй көне агулану очракларын булдырмас өчен белгеч киңәшләре

Җәй көне исә мондый күңелсез очраклар бермә-бер арта.

Балалар гастроэнтерологы Людмила Владимировна Морокова исә җәй көне “куркыныч” продуктлар исемлеген атап узды. “Бирегә барлык сөт продуктлары, тортлар һәм кремлы тәм-томнар, тавык йомыркасы, балык һәм диңгез продуктлары, ит һәм колбаса эшләнмәләре, өй консервалары, юылмаган җиләк-җимеш һәм яшелчәләр. Шулай ук бу исемлеккә гөмбәләр, җиләкләр һәм үсемлекләр, агулы химик катнашмалар белән пычранган авыл хуҗалыгы продуктлары да керә. Моннан тыш, авыру китереп чыгаручы микроблар кешенең пычрак кулларыннан, чебеннәрдән һәм кимерүчеләрдән, тизәкләре белән суны, туфракны, үсемлекләрне пычратучы авыру хайваннардан азыкка эләгергә мөмкин”.

Гастроэнтеролог җәйге эсседә агуланудан саклану буенча берничә киңәш белән бүлеште:

1. Ит, балык һәм салатларны әзерләгәч, шунда ук ашап бетерегез. Аларны суыткычта саклауның максималь вакыты – 6 сәгать. Сөтне исә бөтенләй сакламау яхшырак.

2. Әгәр дә шешәле булмаган яки фильтрланмаган су эчсәгез, аны башта яхшылап кайнатыгыз. Шунысын да истә тотарга кирәк: кайнатылган су беренче 4-6 сәгатьтә генә куркыныч түгел.

3. Шикле сату нокталарында шаурма, коймак, кабартма һәм башка әйберләр сатып алырга тырышмагыз.

4. Юылмаган чикләвек, җиләк-җимеш һәм яшелчәләрне кабып караудан баш тартыгыз. Хәтта кабыклы булганнарын да юмыйча ашарга ярамый. Аларны хәтта духовкада 150 градуста 8-10 минут тотарга киңәш ителә.

5. Десертлар белән сак булыгыз. Бигрәк тә аларда крем була икән, сатып алганда, аның сыйфатын, саклану вакытын яхшылап тикшерегез.

Илүзә Касыймова әзерләде