Чәч коелса – анализ тапшыр

Кеше башындагы чәчләрнең 10-20 проценты, гадәттә, “үле” була һәм аларның коелуы гадәти күренеш, ди белгечләр. Көн дәвамында 80-100 бөртек чәчегездән мәхрүм каласыз икән, борчылыр урын юк. Әгәр дә инде күбрәк коела башласа, димәк, организмга нидер  җитми.  

Күпләр бу проблеманы халык медицинасы ярдәмендә чишәргә омтыла. Мисалга, әрекмән мае яисә суганны чәч төпләренә сөртәләр. Әмма табиблар бу ысул нәтиҗәсез булуы өстенә, баш тиресенә зыян салырга һәм аллергия китереп чыгарырга мөмкин дигән фикердә. Чөнки чәчләр ниндидер дефицит булган очракта коела, ягъни иң элек организмны эчке яктан дәвалау таләп ителә. Мисалга, анемия булса, тимер җитмәсә, калкансыман биз дөрес эшләмәсә, башыгызга нәрсә сөртсәгез дә файдасы булмаячак. Шуңа да сәбәпне ачыклау өчен башта анализлар бирергә кирәк.   

Поливитаминнар да бу очракта файдасыз.   
Ә менә баш тиресенә массаждан баш тартмагыз. Ул кан әйләнешен яхшырта, тынычландыра.  

Фен белән чәч киптерү дә аларның санын киметмәячәк. Иң мөһиме термосаклагыч кулланыгыз. Шул очракта зыяны булмас. 
Әгәр дә сез чәчне бармакка чорнап, “уйный” торган гадәтегез бар икән, аны онытыгыз. Чөнки чәчнең фолликулаларына зыян китереп, коела башлавы ихтимал.  

Фото: ru.freepik.com