Керамика, титан, тефлон: кайсы таба организм өчен хәвефлерәк?

Аш бүлмәсендә хуҗабикәләр кәстрүл һәм табаларны еш куллана. Хәзер аларның төре шактый. Телевизордагы реклама коткысына бирелеп, “уңайлы”, “ризыкны ябыштырмый” дигән сылтау белән күбебез  антипригар табаларга күчеп бетте.

Зыянлылыгы ягыннан карасак, беренче урында тефлон; аннан мрамор, титан, алмаз, гранит табалар. Өченче урында керамик табалар санала.

Тефлонның нәрсә икәнен кызыксынганыгыз бармы? Бу политетрафторэтилен һәм перфтороктан кислота (PFOA). Әгәр дә политетрафторэтилен организмга эләгә икән, күләме 200-260 гр чамасы булганда зыяны юк һәм куркыныч матдәләр бүлеп чыгармый. Тефлон PFOA бәрабәренә зыянлы була. Аны исә табаның өслеген каплар өчен кулланалар. Техник нормалар үтәлсә, PFOA аз микъдарда гына кулланыла һәм организмга зыян салмый.

Табаны артык кыздырганда бүленеп чыккан газлар зыянлы булуы ихтимал. Әмма өй шартларында без табаларны ул дәрәҗәдә кыздырмыйбыз.

Шуңа да үзләрен яхшы яктан “күрсәткән” табаларга өстенлек бирегез. Әгәр дә табаның өслегенә зыян килгән икән, аны кулланмау хәерле.
Мрамор һәм алмаз, гранит өслекле табаларда да шул ук тефлон кулланыла. Әмма аңа тагын мрамор яисә гранит кушыла. Бу табаны тагын да ныклырак итә һәм озаграк файдалану мөмкинлеге бирә.

Титаннан ясалган табалар да популяр. Мондый табаның өслегенә шулай ук титан йөгертелә. Җитештерүченең максаты – табаның корпус өлешен нык һәм озак вакытка чыдамлы итү.

Керамик өслекләр иң куркынычсыз санала. Ул кремний, кислород  һәм углерод кушылмасы. Мондый өслек бик “нәзберек”. Әгәр дә табаны төшереп җибәрсәгез, өслеге ярылырга да мөмкин. Шулай да табиблар нәкъ менә шундый өслекле табалар сәламәтлек өчен куркыныч тудырмый ди һәм аш бүлмәсендә керамик өслекле савыт-сабаларга өстенлек бирергә киңәш итә.

Тагын нинди табаларда кыздырырга ярыймы? Чуен! Ул авыр һәм андый табаны чистарту кыенрак. Шулай да әбиләребездән калган мондый табалар сәламәтлеккә зыян салмый.

Шулай ук  PFOA маркировкасы булмаган башка төрле өслекле табалар кулланырга мөмкин.
Шуны да истә тотыгыз: иң арзан бәяле табалар алмагыз, куллану кагыйдәләрен истә тотыгыз һәм табаларны вакытында (1,5 ел саен)  алыштырыгыз.

Фото нейрочелтәр ярдәмендә әзерләнде