Нәрсә ашыйсыгыз килә? Организмыгыз нәрсә сорый?

Авырлы хатыннар ризык төрләнгәндә ни генә сорап аптыратмыйлар? Кемнең җәй уртасында яңа суелган ат ите ашыйсы, йә чиле-пешле  сарык башы кимерәсе килә. Икенче берсе кып-кызыл татлы алманы тозга манып сыпырта. Өченчесенә кара тавык муены тиресе яки үрдәк бүтәкәсе бүген үк кирәк, юкса карындагы бәбиенең бите шадра яки муены тамгалы булачак, имеш. Көмәнле чагында, бер сеңлебез чыраен да сытмыйча, көн саен диярлек килолап лимон ашады. 

Боларның берсе дә очраклы хәл түгел. Организм үзенә нинди витаминнар, ферментлар, макро-, микроэлементлар җитмәвен вакытында искәртә, бары тик шартлы сигналларны аңлый белергә, үз вакытында ярдәм итәргә кирәк. Әгәр шоколад ашыйсыгыз килсә, сезгә магний җитми. Кичекмәстән кыздырылмаган көнбагыш, чикләвек, банан һәм карабодай боткасы ашарга кирәк. Организмы азотка кытлык кичерүчеләр камыр ризыкларына мөкиббән. Ул аксымга бай иттә, балыкта, кузаклыларда, чикләвектә бар. Кальций макроэлементы җитәрлек күләмдә булмаса, брокколи, сыр, көнҗет, кузаклылар, сөт һәм әчегән сөттән ясалган ризыклар ашарга кирәк.

Лимон ашыйсыгыз киләме? Бу факт организмда С витаминына һәм кальций тозларына ихтыяҗ булуы турында кисәтә. Чирләп урында яткан чакта, гадәттә аппетит начар була. Күңел эзләнә. Әллә нинди ят нәрсәләр ашыйсы килгән кебек була. Бу очракта авитаминоздан котылырга маринадланган кыяр-помидор, әчетеп тозлаган кәбестә, организмдагы фосфор кытлыгыннан арыну өчен, ысланган яки тозлы балык, ит ризыклары, диңгез продуктлары  ярдәмгә килә. 

Хәмидә Гарипова.