Туңдырылган җиләк-җимешнең файдасы бармы?

Беренчедән, алар иммунитетны ныгыта. Икенчедән, салкыннан барлыкка килә торган ялкынсынуларга каршы көрәшә. Эчәклекләр микрофлорасы өчен дә җиләк-җимеш файдага гына.

Белгечләр искәртүенчә, җәен туңдырган җиләк-җимешнең дә организмга файдасы әйтеп бетергесез. 
Карасу төстәге җиләк-җимеш антиоксидантларга бай. Ә ачык төсле сырганакта флавоноидлар күп. Алар организмның күзәнәкләрен чистартып, тәртиптә тота. 

Җиләкләрдәге пектин һәм йомшак ризык җепселләре иң яхшы пребиотик санала. Алар эшкәртелми, әмма эчәклек микрофлорасы өчен файдалы азык санала. Ә сәламәт микробиом безнең иммунитетның 70 процентын тәшкил итә. Тән тиресе чиста, шома була, кәеф “тирбәлешләре” күзәтелми. 

Гәүдә авырлыгын контрольдә тотучылар өчен җиләк-җимеш бик яхшы альтернатива санала. Бигрәк тә баллы ашыйсы килгәндә, организмны глюкозага “туендырам” дисәгез, җиләк-җимеш ашагыз. Өстәвенә, клетчатка белән кушылганга, мондый шикәр канда глюкоза күләмен арттырмаячак. 

Җиләк-җимешнең файдалы үзенчәлекләре саклансын дисәгез, “шок” ысулы белән катырыгыз. Моның өчен җиләк-җимешне юып киптерергә һәм бер рәт итеп тезеп, туңдыргычка куярга. 

Җиләк-җимешне киптергән очракта, минераллар, антиксидантлар, клетчатка сакланып кала. Әмма шикәр концентрациясе 4-5 тапкырга артачак. 
Пюре яисә смузи итеп катырсагыз, җиләк-җимешнең барлык файдалы үзлекләре дә саклана. Шул исәптән, клетчатка да. 

Олы кешегә көненә 100-150 гр җиләк-җимеш ашарга киңәш ителә. Кипкәннәрен 20-30 гр ашарга ярый. 

Өч яшьтән зуррак балаларга 50-80 гр җиләк-җимеш ашарга мөмкин. Әмма аллергия булмаган очракта гына. 

Өлкәннәргә 80-100 гр җиләк-җимеш ашарга ярый. Алар баш миендә кан әйләнешен яхшырта. Эч кату белән интегүчеләргә сак булырга, җиләкләрне изеп ашарга киңәш ителә. 
 
 

 Лилия Локманова әзерләде