#Киңәш сандыгы 23 июль 2017, 12:48

Көл – иң яхшы ашлама

23 июль 2017, 12:48

Аңарда үсемлекләр өчен файдалы булган 30га якын минерал бар. Көл белән бигрәк тә кабак, кәбестә, бәрәңге, чөгендер, помидор һәм кыярны тукландырырга кирәк.

Скопировать ссылку

Көл ике төрле була: мунча миченнән чыккан һәм агачны махсус яндырып эшләнгәне. Икенчесе экологик яктан чистарак. Ни өчен дигәндә, мичтә, утыннан кала, полиэтилен да, пластика да, резина яки синтетика да янарга мөмкин, алардагы зарарлы матдәләр көлгә дә күчә. Калий бигрәк тә каен агачын яндырудан барлыкка килгән көлдә күп. Интернетта көлне ашлама буларак куллану буенча киңәшләр шактый. Аларны кулланыр алдыннан көлнең күләмен дөрес билгеләргә кирәк.

Бер аш кашыгына - 6 грамм, бер стаканга - 100 грамм, ярты литрлы банкага - 250 грамм, бер литрлы банкага 500 грамм көл сыя.
Көлне коры килеш сибәргә дә, суга кушып та файдаланырга була. Су белән кушкан очракта, бер стакан көлне ун литр суга салып болгатыгыз. Кулланыр алдыннан тагын болгатып алырга киңәш ителә. Көлле суны үсемлекнең төбенә сибегез.
Көлне төнәтеп тә сибәргә мөмкин. Чиләкнең өчтән бер өлеше кадәр көл салып, аның өстенә чиләк тулып җиткәнче кайнар су агызыгыз һәм ике көн төнәтегез. Соңыннан сөзеп алып, үсемлекләргә сибәсез. Төнәтмәне аена ике-өч тапкыр сибә аласыз.

Кызыклы яңалыкларны күзәтеп бару өчен безнең МАХ каналына кушылыгыз.