Машина алырга уйлаган кешегә киңәшләр

Машина сатып алганда, алдагы берничә елыгызны күз алдына китерегез. Бала табарга уйласагыз, ике ишекле машина туры килми. Башта ук гаиләле вариантны карарга кирәк.  

Машинаның бәясен генә түгел, аны карап тору өчен күпме акча китәсен дә исәпләгез. Запас частьлары кыйммәт булса, гаилә бюджетына зыян килмәсме?
Тотылган машина арзанрак тора. Шул ук вакытта яңа арзанлы машинага караганда, югарырак класслы тотылган машина да алырга була. Әмма яңа гына салоннан чыккан машинага ремонт таләп ителми, кулланышта булганына акча түгәргә туры килмәгәе.   

Акчаны җыеп булмаса, автокредит турында уйлагыз. Кулланучылар кредитына караганда, автокредитта процент ставкасы түбәнрәк.
Тотылган машина аласы булсагыз, VIN-код, ягъни идентификацион номерына игътибар итегез. Аның буенча машинаны Дәүләт автоинспекциясе сайтында тикшереп, юл һәлакәтенә очрау-очрамавы, урланганмы, түгелме икәнлеген белеп була. Шулай ук залогта түгелме, штрафлары “эленеп” тормыймы икәнлеген, элеккеге хуҗалары исемлеген дә күрә аласыз.

Машина өч-биш ел элек кенә чыккан булса, шул марканың сервис үзәгенә яки рәсми диллерына шалтыратып, әлеге машинаның анда каралганмы-юкмы икәнлеген белергә мөмкин. Белгечләр караган булса, шикләнергә сәбәп калмый. Шунда ук машинаның ничә чакрым йөргәнен дә ачыкларга була.

Фото: https://pixabay.com/