Татарстанда җепшек кар көтелә

Көчле җил, җепшек кар һәм бозлавык тыныч көннәр белән чиратлашып торачак, дип белдерә синоптиклар. Бу хакта республиканың Гидрометеорология үзәге хәбәр итә.

Бүген республикада явым-төшемнәр, шул исәптән җепшек кар явуы, көчле җил һәм бозлавык көтелә. Әмма чәршәмбе һәм пәнҗешәмбе көннәрендә антициклон йогынтысында һава торышы тынычрак булачак. Сизелерлек явым-төшемнәр көтелми. Төнлә һава температурасы -6...+1 градус, көндез −1..+5 градус була.

Якынча фаразлар буенча, 28 октябрьдә циклон йогынтысында Татарстанда кабат яңгыр һәм җепшек кар явачак. Икенче көнне явым-төшемнәр ихтималы аз – республиканың көнчыгыш районнарында урыны белән явым-төшемнәр булуы мөмкин. Көндез -2...+3 градус була. Төнлә юлларда бозлавык булырга мөмкин, дип кисәтә синоптиклар.

Чыганак - "Татар-информ"