Акыллылар киләчәктә яши инде

Мәгълүмати технологияләр буенча кадрлар туплау үзенчәлеге, сәнәгать паркларының иң яхшы тәҗрибәләре, проектлар белән идарә итү, авыл хуҗалыгы тармагында мәгълүмати технологияләргә кагылышлы карарлар кабул итү, салым куркынычсызлыгы системасы, халыкара сәүдә тармакларына чыгу... Форум кысаларында нинди генә семинарлар, түгәрәк өстәлләр узмады. Пленар утырыш алдыннан Президент Рөстәм Миңнехановны күргәзмә белән таныштырдылар. Киләчәк - яшьләрнеке, акыллылар, булдыклылар анда яши дә инде. Президентка Сөембикә манарасы төшерелгән каһвә тәкъдим иткән яшьләрне күргәннән соң нәкъ менә шундый фикер килде. Бүгенге көндә эшләп ята торган алгарышларга килсәк, аларның иң игътибарга лаеклыларының берсе - «Бизнес-навигатор». Әлеге проект ярдәмендә бизнес-план төзергә дә, үзеңнең эшең өчен бина табарга да, көндәшләрең арасында үзең тоткан урынны билгеләргә дә була. Анда теркәлү дә, куллану да бернинди авырлык тудырмый.
- Дөньяда башка мондый проект юк. Россиянең бөтендөньядагы сәүдә вәкилләреннән сораштык, бу - аларның фикере дә. Проектны эшләгән һәм эшләүче командага зур рәхмәт. Эш тукталмый, чөнки ул гел яңартылып торачак, - диде проектны тормышка ашыручы компаниянең генераль директоры Александр Браверман.

«Бизнес-навигатор» бүгенге көндә Казан, Чаллы, Әлмәт, Түбән Кама шәһәрләрендә эшли. Кулланучыларның саны 7 меңгә якынлаша, теркәлүчеләр исә Россия буенча 68 мең һәм аларның барысы да эшмәкәрләр.

- Эшмәкәрләргә үз эшләрен оештыру һәм хаталарны азрак ясау өчен бу уникаль проект. Бүгенге көндә без мәктәп эскәмиясеннән, югары уку йортлары кысаларыннан ук эшмәкәрлек рухының ничек үскәнен күрәбез. Уңышларның тарихын күбрәк күрсәтик, кешеләрдә ышаныч тусын. Әлбәттә, бераз акча бирсәң, яңа төрле эш алымнары уйлап чыгарсан, кайдадыр әзрәк «майлап» җибәрсәң, ышаныч та ныграк була, - диде Рөстәм Миңнеханов.