#Кыскача яңалыклар 15 февраля 2019, 11:46

Алинә Заһитова Татарстан җитәкчеләрен илһамландырган

15 февраля 2019, 11:46

Фигуралы шуу буенча Олимпия уеннары җиңүчесе Алинә Заһитованың уңышлары татар халкын спортка җәлеп итеп кенә калмады, җирле җитәкчеләрне дә республикада яңа спорт объектлары төзергә илһамландырды.

Скопировать ссылку

Якын киләчәктә Казанда 700 миллион сумга яңа боз сарае торгызмакчылар. Хәзерге вакытта спорт объектына урын эзлиләр.

Алинә Заһитова, Евгения Тарасова, Камилә Вәлиева – бу кызларның спорт карьерасы нәкъ менә Татарстанда башланды, ләкин йолдыз булып алар Мәскәүдә «кабынды». Сәләтле яшьләрне читкә җибәрмичә, үзебездә тәрбияләү максатыннан, Татарстан спорт министры Владимир Леоновка Олимпия чемпионнарын әзерли торган яңа боз сараен төзергә кушканнар. Яңа үзәкне легендар тренер Нина Мозер җитәкләячәк.

Башта боз сараен Казан дәүләт ветеринария медицинасы академиясе яки «Казан-Арена» стадионы янәшәсендә төземәкче булганнар. Соңыннан спорт объекты Идел буе районында булырга тиеш дигән карарга килгәннәр.

– Безнең барысы да әзер инде, төзелеш өчен урынны гына билгелисе калды. Бинаны Татарстан үз көче белән генә төзи алмаячак, монда федераль проект кирәк. Ләкин берничә елдан без хыялыбызга ирешербез, чөнки бу бик зур өметләр баглый торган объект, – диде боз сарае турында Владимир Леонов.

Фигуралы шуудан тыш, боз сараенда шорт-трек спорт төре өчен юл булдырачаклар. Шорт-трек шулай ук Олимпия уеннары исемлегенә кергән.

Кызыклы яңалыкларны күзәтеп бару өчен Телеграм-каналга кушылыгыз.

#Алинә Заһитова