Белгечләр Кытайга ял итәргә барудан тыелып торырга куша

- Юллама алганда туристлык агентлыгының туроператор белән төзегән килешүен сорарга кирәк. Чынлап та аларның туристлык продуктын сатамы- юкмы икәнлеге белән кызыксыныгыз. Туристлык агентлыгында сезгә бару-кайту, яшәү, туклану шартлары турында бәйнә-бәйнә сөйләргә тиешләр.

Турагент вәгъдә иткән хезмәтләр килешүдә чагылырга тиеш. Соңгы ике елда бертөслерәк мөрәҗәгатьләр кабул ителде. Әйтик, бер оешма турпродукт урынына алдан урын броньлау турындагы килешүне тәкъдим иткән. Кулланучылар килешүне яхшылап укып карагач, анда юл, ашау кебек пунктларның булмавын ачыклаган. Аларның акчаларын кире алганда проблемалар килеп туды. Кайбер очракта биш йолдызлы кунакханә урынына түбәнрәк категориялесенә урнаштырып куярга яки диңгезгә унбиш минутлык юл дигәне бер сәгатьлек булырга мөмкин. Көтеп алган ялыгыз кәефегезне бозмасын өчен килешү төзегәндә игътибарлы булыгыз, - дип сөйләде ул "Татар-информ" мәгълүмат агентлыгында узган матбугат конференциясендә.

"Казан" аэропортының Татарстан таможнясы посты башлыгы Мирзанур Гәрәев сүзләренчә, соңгы биш айда, узган елгы шушы чор белән чагыштырганда, халыкара рейслар саны 80 процентка арткан. Аның каравы, таможня аша чыкканда кагыйдә бозуларның да саны ике тапкырга арткан. Административ хокук бозуларга килгәндә, алкоголь эчемлекләр, тәмәке, салкын корал, Кызыл китапка кертелгән төрле хайваннар сөкәте (чучело), экстремистик әдәбият алып керүләр ешайган. Мирзанур Гәрәев товарларның авырлыгы 50 кг нан арткан яки аларның бәясе ун мең евро булган очракта таможня декларациясен тутырырга кирәклеген дә искәртте. Аны Федераль таможня хезмәте сайтында шәхси кабинет булдырып, электрон форматта да тутырып була, диде ул.

Роспотребнадзор идарәсенең санитар сак террриториясе буенча бүлек җитәкчесе Луиза Борисова да үзенең чыгышында, үткән ел белән чагыштырып караганда, чит илдән инфекцион авырулар алып керү куркынычының артуын билгеләп үтте.
- Конго, Ангола, Ямәндә инфекцияләр, аерым алганда, Эбола вирусы һәм холера таралган вакыт. Кытайда исә кош гриппы йоктыруның яңа очраклары билгеле булды. Әлеге илләргә барганда сак булырга кирәк, - дип кисәтте спикер.