«Безнең заман»: Казан сәхнәсен эшче яшьләр гөрләтте

Күп кенә профессионаллар да бу дәрәҗәдәге концертлар әзерли алмыйдыр: биредә һәр катнашучы, һәр команда җитди әзерлек күрсәтте. Һәр чыгыш­лары сәнгать әсәре иде. Ул костюм­нар дисеңме, биюләр, вокал... Консерватория тәмамлаган артистларың бер якта торсын! Җыр-биюләрдән тыш хәтта фокус күрсәтүчеләр дә табылды. Чын талантлар халык арасыннан чыга, дип, юкка гына әйтмиләрдер инде.

Татарстанның «Созвездие-Йолдызлык» төбәк яшьләр иҗтимагый оешмасы директоры, проект җитәкчесе Айдар Гайнетдинов та моны билгеләп узды. Аның фикеренчә, катнашучыларның номерлары елдан-ел сыйфатлырак була бара, фестивальгә өлеш кертеп, үзләрен күрсәтергә теләүчеләр саны да арта.

– Фестиваль катнашучылары яшь, шук, күтәренке кәефле. Барыгызны да сабырлык туплап, фестивальнең финалына чакырам. Ике көн дәвамында без номерларны карадык һәм бу бик кызыклы булды. Казан да, бу зал да әлеге зәвыклы фестивальне күрү бәхетенә иреште, – диде Татарстанның халык артисты, фестивальнең жюри рәисе Резеда Галимова.

Өстәвенә, иҗади яшьләргә ярдәм йөзеннән, мастер-класслар, дәресләр дә бирелде. Тәҗрибә белән уртаклашырга Мәскәү белгечләре дә чакырулы иде. Димәк, финалда алар тагын да остарачак. Сүз уңаеннан, быел республиканың 174 оешмасында эшләүчеләр бәйгедә катнашырга гариза биргән булган.