Бу атнага һава торышы билгеле

Фаразлар буенча, бу атнада республикада эссе һәм явым-төшемле һава торышы булачак.

Иртәгә республика актив атмосфера фронтларына якын урнашачак. Кыска вакытлы яңгырлар яварга, кайбер районнарда яшен булырга һәм секундына 20 метр тизлектәге көчле җил исәргә мөмкин. Төнлә +13…+8, көндез +31 градус була.

Чәршәмбе көнне температура фоны саклана. Шулай ук көндез һәм кич кыска вакытлы яңгырлар, кайбер районнарда яшенле яңгыр булуы, урыны белән боз явуы ихтимал.

Пәнҗешәмбе төнлә һәм көндез Татарстан атмосфера фронты йогынтысында була. Һава торышы шартлары шул килеш саклана. Синоптиклар кыска вакытлы яңгыр, яшен, көчле җил һәм боз вәгъдә итә.

Антициклонның алгы өлеше йогынтысында һәм атмосфера басымы күтәрелү аркасында көндез республиканың көнчыгыш районнарында яңгыр явачак. Һава агымы төньяк-көнбатышка күчү сәбәпле, температура төшә — термометр баганалары +25 градустан да югары күтәрелмәячәк.

Гидрометеорология үзәге фаразларына караганда, 18 июньдә антициклон йогынтысында алмашынучан болытлы, явым-төшемнәрсез һава торышы көтелә. Көндез 24 градус җылы булачак. шимбә көнне бераз яңгыр явуы, һава температурасының +28 градус булуы фаразлана.

Чыганак: "Татар-информ"