“Чәчәк фестивале" башланды

Үзең ясаган чәчәклекне фоторәсемгә төшереп www.flowers.kzn.ru сайтына заявка белән бергә җибәрергә кирәк. Конкурсның кайсы номинациясендә катнашуыңны тамгалау зарур. Җиңүчеләр интернет-тавыш бирү нигезендә көз көне билгеле булачак. "Иң яхшы чәчәкле кадр" номинациясендә фотографлар да үз осталыкларын күрсәтә ала. Беренче урыннарны яулаучыларны бүләкләр көтә.

- Мэр Илсур Метшин башлангычында "Чәчәк атучы Казан" проекты ике ел элек старт алган иде,-дип, искәртте шәһәр башкарма комитеты җитәкчесе урынбасары-тышкы төзекләндерү комитеты рәисе Игорь Куляжев,-узган елгы бәйгедә ике меңгә якын юридик һәм физик зат катнашты. Шәһәр буенча чәчәклекләр 71 мең квадрат метрны тәшкил итте, болардан тыш, баганаларга һәм диварларга чәчәкләр утыртылган унбер мең кашпо эленде.

"Чәчәк фестивале-2016" конкурсына җибәрелгән фоторәсемнәр "Әкият" курчак театры каршындагы сквер аллеясенә куела.

- Биредә ландшафт дизайны һәм экология темасына лекцияләр булачак, осталар дәресләр үткәрәчәк. Болар барысы да бушлай, - диде Игорь Куляжев.
"Әкият" курчак театры каршындагы скверда ял итеп йөргән чакларда анда оештырылачак чаралар программасына күз ташлап китү мәслихәт. Казанда кайбер осталар инде әллә нинди экзотик агачлар һәм чәчәкләр үстерә башлаганнар. Лекция-дәресләрдә алар белән очрашу мөмкинлеге бар.