Чүп өчен яңача түли башлыйбыз

Алар чүпне җыю, ташу, эшкәртү, утильләштерү, зарарсызландыру һәм күмү белән шөгыльләнәчәк, гомумән алганда, чүп-чар әйләнеше өчен тулаем җавап бирәчәк. Ә безгә бу хезмәтләр өчен түлисе генә кала. Элек чүп өчен квадрат метрдан чыгып түләсәк, хәзер аны кеше башыннан исәпләячәкләр. Чүп чыгарган өчен квадрат метрдан 2,8 сум түли идек. Кайбер авыл җирлекләрендә гомумән аның өчен түләү юк иде. Шуңа да алар бу яңалыкны тагын да авыррак кабул итәргә мөмкиннәр. Әмма түләргә кирәк була. Бер кеше аена 71,95 сум түләячәк. Бер фатирда берничә кеше яшәгән очракта, шактый сумма түләргә кирәк булып чыга. Шәхси торакта яшәүчеләргә килгәндә, бәя 78,05 сумны тәшкил итәчәк. Яңа тарифлар турында Татарстан Төзелеш, архитектура һәм торак-коммуналь хуҗалыгы министрлыгы коллегиясенең киңәйтелгән утырышында хәбәр иттеләр.
– Калдыклар белән эш итү инфраструктурасына үзгәрешләр кертеләчәк. Ике зонада 11 чүп-чарны сортларга аеру станциясе, 5 муниципальара каты көнкүреш калдыклары полигоны төзү планлаштырыла, – дип белдерде утырышта Татарстан Төзелеш, архитектура һәм торак-коммуналь хуҗалыгы министры Ирек Фәйзуллин.

Татарстанда каты коммуналь калдыкларны күмү буенча 49 полигонның 13е тулысынча тулган, чөнки республикада бер ел эчендә генә дә 1 млн 613 тонна каты коммуналь калдыклар барлыкка килә.
Россия төбәкләрендә чүп чыгарган өчен нинди тарифлар куелганын rosregistr.ru сайты язып чыккан. Мәскәүдә бер кешегә 90 сум туры килә. Санкт-Петербургта 85,38 сум, Иркутскида 87,5 сум, Краснодарда 97,32 сум, Иваново өлкәсендә 88 сум түлиләр. Коми республикасында исә тагын да зур сумма килеп чыга. Анда аена һәр кеше 165 сум түләргә тиеш. Иң аз сумманы Дагестан һәм Калмыкия халкы түли. Аларда сумма 62 сумнан артмаган. Күрше Чувашиядә 74 сум 44 тиен түлиләр ди.