Чит илгә чыгу кагыйдәләре үзгәрә

14 яшькә кадәрге балаларга Россиядән чыгу өчен туу турында таныклыкта гражданлык турында билге кирәк булачак.

2024 елның 1 мартыннан Абхазиягә, Белоруссиягә, Казахстанга, Кыргызстанга яки Көньяк Осетиягә керү өчен 14 яшькә кадәрге балаларның туу турында таныклыкларында Россия гражданлыгы турында кызыл билге торырга тиеш булачак. Шундый төр билге булмаса, аларны чик аша үткәрмәячәкләр. Бу хакта РИА Новости хәбәр итә.

– Агымдагы елның 1 мартыннан Россия Федерациясе гражданлыгы булуын раслаучы документ (билге) булмаса, балигъ булмаган гражданнарга Россиядән читтә йөрүдән баш тартачаклар, — дип белдерә Россия Федераль куркынычсызлык хезмәтенең Чик буе хезмәтенең матбугат хезмәте.