Диния нәзарәте МХОга гуманитар ярдәм сатып алу өчен ярты миллион сумнан артык акча җыйган

1 августка булган мәгьлүматларга караганда, Татарстан мөфтиятенең “Зәкят” хәйрия фонды битараф булмаган кешеләр ярдәме белән махсус хәрби операция зонасындагы Татарстан солдатларына илтеп тапшырылырга тиешле гуманитар ярдәмне туплау өчен 500 мең сумнан артык акча җыя алган. Әлегә бу – кирәкле сумманың яртысы гына. Сугышчыларның үтенече буенча аларга электроника, азык-төлек, дарулар, маскировка челтәрләре һ.б. сатып алу ниятләнә. Акча җыю төгәлләнгәч, Нәзарәт делегациясе хәрби частьларның берсенә юл тотачак. 

Моңа кадәр мөфтият вәкилләре Луганск өлкәсе юнәлешендәге хәрби частьләрнең берсенә ике тапкыр командировкага барып кайткан иде – әлеге бүлекнең 90 процентын Биектау, Питрәч, Саба, Арча, Балык бистәсе районнары һәм Казаннан килгән Татарстан солдатлары тәшкил итә, алар арасында 50 кеше – дин нигезләрен үтәүче мөселманнар. Шунысы да игътибарга лаек һәм мөһим булып тора: Татарстан мөфтияте делегациясе йөкләрне турыдан-туры солдатларның үз кулларына тапшырды. Соңгы сәфәр изге Рамазан аенда булган иде.

Татарстан мөфтияте барлык битараф булмаган кешеләрне якташ солдатларның үтенеченә игътибар юнәлтергә һәм кирәк-яраклар сатып алу өчен үз өлешеңне кертергә чакыра.

Акчаны Татарстан мөфтиятенең “Зәкят” хәйрия фонды җыя.

Акчаларны җибәрү өчен реквизитлар нәзарәт сайтында бирелгән. 

Сүз уңаеннан, Россиядә Кораллы Көчләргә контракт буенча хәрби хезмәткә алу дәвам итә. Килешү төзегән һәр кешегә бер мәртәбә 195 000 сум акча түлиләр. Ә махсус хәрби операция зонасында айлык түләү 204 000 сумнан башлана. Тулырак мәгълүматны http://heroes-tatarstan.ru сайтыннан яки 117 номерына шалтыратып белешә аласыз.