Ел студентына 50 мең һәм дөньяның теләсә кайсы югары уку йортында белем алу мөмкинлеге бирелде

«Татарстан Республикасының ел студенты-2018» XIV республика премиясенең финалы Студентлар көнендә «Пирамида» мәдәни-күңел ачу комплексында узды. Студентларны котларга Татарстан Дәүләт Советы рәисе Фәрит Мөхәммәтшин да килгән иде.

– «Ел студенты» премиясе – 14 ел дәвамында Татарстанда уза торган яхшы проект, анда без яшьләрне төрле номинацияләрдә хөрмәтлибез. Сез барыгыз да җиңүчеләр дип уйлыйм, чөнки бездә иң креатив һәм энергияле яшьләр, — диде чыгышында Фәрит Мөхәммәтшин.
Республиканың яшьләр эшләре министры Дамир Фәттахов та бу бәйгенең студентлар өчен мөһимлеген искәртте.

– Студентларга бу үзенчәлекле Оскарны тапшыру традициягә әйләнеп бара. Сезнең эшчәнлеккә нәтиҗәләр ясарга мөмкинлек биргән мондый чаралардан башка студент тормышын күз алдына да китереп булмый, – диде ул, студентларны котлап.

Гран-придан тыш, бәйгедә төрле номинацияләрдә беренчелеккә чыккан 18 җиңүчене дә бүләкләделәр. Әйтик, «Елның чит ил студенты» исеменә Казан илкүләм тикшеренү технология университетыннан Рамира Мигранова, «Ел журналисты» булып шул ук уку йортыннан София Бармина танылды. Казан федераль университеты студентлары да бик актив: Михаил Ягофаров – «Ел интеллекты», Юлия Зобинина – «Ел спортчысы», Ольга Плотникова – «Иң иҗади студент», Энже Камалетдинова «Ел волонтеры» исемен алды. Әлмәт дәүләт нефть институтының фәнни техник җәмгыяте «Елның иң яхшы фәнни оешмасы» исеменә лаек булды.
Быел бәйгегә барлыгы 300гә якын гариза кабул ителгән булган. Конкурсның финалында 63 студент көч сынашкан.

Сүз уңаеннан, студентларны бәйрәмнәре белән котлап, Татарстан Президенты Рөстәм Миңнеханов та инстаграм челтәрендә фотоларын урнаштырды. Бәйрәм уңаеннан ул үзенең студент чакта төшкән фотосы белән бүгенге сурәтен янәшә куйган, пост астында «Иртәгә син кем буласың, бүгенге студент?» дип тә язган. Аның бу котлавын студентлар яратып кабул иттеләр, постка карата 400дән артык комментарий калдырырга да өлгерделәр.

Фото: tatarstan.ru