Эльмир Низамов: «Путинның үзен яңа срокка тәкъдим итүе логик яктан эзлекле»
Россия дәүләт башлыгы Владимир Путинның яңа президентлык срогына тәкъдим ителү карарына композитор Эльмир Низамов фикерен белдерде.
Россия дәүләт башлыгы Владимир Путинның яңа президентлык срогына тәкъдим ителү карарына композитор Эльмир Низамов фикерен белдерде.
«Хәзерге Президентның үзен яңа срокка тәкъдим итүе логик яктан эзлекле. Ә анда инде сайлаучы сайлаячак», — диде Низамов «Татар-информ» белән сөйләшкәндә.
Владимир Путин вакытында мәдәният тармагында яхшы курс алынды, мәдәният эшлеклеләре тагын да күбрәк теләсә дә, күп нәрсә эшләнә, диде композитор.
«Аның белән берничә ел элек, Россия Президентының яшь мәдәният эшлеклеләре премиясен алгач, сөйләшүебезне искә төшерәм. Ул вакытта мин композитор һөнәренең статусы турында мәсьәләне күтәрдем. Шунда ук булмаса да, тиз түгел, әмма композитор һөнәре статусында үзгәрешләр башланды. Бу дәвам итәр һәм безнең мәдәниятебез үсәр дип өметләнәм», – дип истәлекләре белән уртаклашты ул.
Россия Президентын сайлаулар өч көн — 2024 елның 15-17 мартында узачак, дип хәбәр итте Россия Үзәк сайлау комиссиясе. Җиңгән очракта, Владимир Путин өчен бу инде бишенче Президент каденциясе булачак.
Исегезгә төшерәбез, яңа срокка тәкъдим ителү карары турында Владимир Путин бүген — Ватан Геройлары көне уңаеннан уздырылган тантанада игълан итте.
Комментарийлар