Хәрби уку йортлары тәҗрибә белән уртаклаша

Түгәрәк өстәлдә четрекле мәсьәләләр күтәрелде. Коры җир гаскәрләре гаскәри башлыгы генерал-полковник Олег Салюков бүген суворовчыларга ватанпәрвәрлек, үз уку йорты өчен горурлык хисе җитеп бетми, ди.

- Күптән түгел 20 ел элек Суворов көллиятен тәмамлаган кеше белән очраштым. Аның нәкъ менә шушы уку йортында белем алуы турында горурланып сөйләвен күрсәгез иде. Безнең укучылар да шундый булсын иде. Ләкин әлегә нәкъ киресе килеп чыга. Ата-аналар безгә балаларын төрле тәрбия алсыннар, йомшак булып үсмәсеннәр дип бирә. Ләкин безнең максат ул гына түгел. Без булачак хәрбиләрне әзерләргә тиеш. Әлегә гомуми белем бирү буенча да артта барабыз. Мәсәлән, Мәскәүдәге Суворовчылар көллиятендә математика буенча белем бирү иң түбән дәрәҗәдә. Казан гына яхшы күрсәткечләр бирә. Укытучылар, без тәрбиячеләр түгел дип чаң суга. Хәрби уку йортында андый хәл булырга тиеш түгел. Укытучы җаны-тәне белән биредә булырга тиеш. Балаларның 30-40 проценты безнең уку йортын тәмамлагач, хәрби юлдан баш тарта, граждан тормышына кире кайта.
Димәк, шушы җиде ел эчендә без анда хәрби кеше әзерли алмадык, бу эшкә мәхәббәт булдырмадык. Бу безнең хата, - дип кызып-кызып сөйләде Олег Салюков.

Ул суворовчылар өчен "Юнармия хәрәкәте"нә кушылу да файдага булачак дип белдерде.

- Пионерлар заманы үтте, ә алардан соң килгән бушлыкны ни беләндер тулыландырырга кирәк. Бу урынны урам тәрбиясе алганчы "Юнармия хәркәте" нә кушылу кирәк. Биредә 8-18 яшьлек егетләр керә ала. Җәй көне хәрби-патриотик лагерьлар оештыралар, спорт секцияләре бар. Олимпия чемпионнары да юнармеецлар белән даими очрашып тора, - диде Олег Салюков.

Гади мәктәптән килгән укучы да, Суворов, кадет мәктәпләрен тәмамлаганнар да югары хәрби уку йортларына бертигез дәрәҗәдә Бердәм Дәүләт имтиханнары нәтиҗәсендә керә. Ләкин хәрби мәктәпне узганнар тәртип, билгеләр нәтиҗәсенә карап тагын өстәмә балл бирәләр.

- Ул бит җиде елын безнең кул астында укыды. Бу вакыт бушка үтәргә тиеш түгел. Безнең көллиятне тәмамлаучылар хәрби уку йорталырна кергәндә төп имтихан күрсәткечләренә 10 балл өстәлергә тиеш. Югары уку йортлары белән тагын да тыгыз элемтә булдырырга кирәк. Уку йортлары безгә килеп балаларның белем дәрәҗәсен тикшерсә, кайсы якка басым ясарга кирәклеген әйтсә, тагын да яхшырак булыр иде, - диде генерал-полковник.