Хәзрәтләр ифтар вакытында нәфесне тыя белергә кушты

23 мәчеттә рамазан ае дәвамында Коръән-хәтем чыкканнар. Татарстан мөфтие Камил хәзрәт Сәмигуллин әйтүенчә, быел да ураза аенда әлеге традицияләр дәвам иттереләчәк. Төркиядән республика мәчетләренә Коръән хафизлар киләчәк.

- Шимбә алар килеп тә җитәчәк. Барысы 38 Коръән хафиз килергә теләк белдерде. Берничәсе Казанда калып, калганнары районнарга китәчәк, - дип сөйләде журналистларга Камил хәзрәт.

Мөфти иртәгә беренче тәрәвих намазы укылачагын да хәбәр итте. 27 майда исә уразага керәчәкбез. Камил хәзрәт әйтүенчә, быел фитыр сәдакасының күләме 100-600 сум. Һәркем үзенең байлыгына карап бирәчәк. Зәкят түләү өчен нисаб күләме 198 000 сум дип билгеләнгән. Шуның кадәр акчасы булган кеше бай санала, диде мөфти.

Матбугат очрашуында катнашкан мөфти урынбасары Рөстәм хәзрәт Вәлиуллин сүзләренчә, ураза ул нәфесне дә тәрбияли.

- Аллаһы Тәгалә ураза аркылы кешеләрнең җаннарын һәм тәннәрен тәрбияли. Сәхәрне кая, ифтарны кая ашыйм икән дип баш ватып йөрергә кирәкми. Күпләр өендә әзерләгән ифтарда чикне белеп ашый, мәҗлескә барып күп итеп сыйланып кайта да ашказаны авырта башлый. Нәфесне тыя белергә кирәк. Аннары күп кенә мөселманнар рамазанга кадәр үк атнасына бер-ике көн ураза тота башлады. Бу организмга тиз җайлашырга булыша, - дип сөйләде ул.